ВМРО-ДПМНЕ останува на позициите од Прогласот и на стратешките прашања од државен и национален интерес

ВМРО-ДПМНЕ не постигна договор со ДУИ за формирање на влада, но останува на своите принципиелни позиции по однос на стратешките прашања од државен и национален интерес и Прогласот усвоен на 17 декември 2016-та година.

„ВМРО-ДПМНЕ заедно со коалицијата За подобра Македонија како победник на последните избори која доби најголема поддршка од граѓаните и освои најголем број гласови и пратеници, смета дека формирањето на Влада треба да биде во функција на затворање на политичката криза, а не нејзино продлабочување и смета дека одржувањето на нови избори е зрело решение, а во функција на надминување на кризата и поставување на реформските приоритети во прв план.

Секое друго решение само ќе доведе до нова конфликтност и проблеми во и онака поделеното општество и нема да биде во функција на одржливост и остварување на било чии програмски цели.

Очигледно некој сака да се занемари волјата на мнозинството граѓани и да ја втурне Македонија во некоја нова неизвесна фаза од нејзиниот развој. ВМРО-ДПМНЕ останува на своите принципиелни позиции по однос на стратешките прашања од државен и национален интерес и прогласот усвоен на 17 декември 2016-та година“, соопштуваат од ВМРО-ДПМНЕ.