Милошоски: Заплашувачкото однесување од страна на власта имаше влијание на изборните резултати

Најпрво би сакал на сите граѓани на Република Македонија да им го честитам овој државен празник 23 октомври. Формирањето на Македонската револуционерна организација е темелот за создавањето на македонската држава, која што денес имаме благодет да ја живееме и да ја унапредуваме, изјави Антонио Милошоски во интервју за телевизија Нова.

Како што кажа Милошоски, тој мисли дека е многу недостоинствено што се укинала наградата 23 октомври како државна, бидејќи овој празник, формирањето на револуционерната организација за македонска држава е празник кој што треба да обединува, исто како што обединува 11 октомври, Илинден и многу други светли празници во македонската историја.

-Но, тоа говори за идеолошкото и партиското делување сегашната актуелна Влада, која што за жал не секогаш е во склад со националните интереси. Но, како и да е, празници или наградите може некој да ги укине, но за брзо време, се е менливо, некој друг брзо ќе ги востанови, бидејќи овој празник и награда за државност и за револуционерната организација е празник кој што заслужува да се чествува се додека постои Република Македонија, изјави Милошоски.

Тој кажа дека тие како политичка партија која чувствува дека има капацитет да биде алтернатива на сегашната Влада, за скоро време ќе најдат начини како овој празник и свечено да се одбележува и државната награда повторно да се доделува. Милошоски во интервјуто се осврна и на локалните избори, на кои во недела се одржува вториот круг.

-Очекувавме подобар резултат, сметам дека имаше неколку фактори кои што влијаеа на овој резултат. Прв фактор како една инерција од претходните избори. Вториот факт е и дека имаше одредени неисполнети очекувања или од одредени потези на ВМРО-ДПМНЕ, што можеби кај дел од нашите поддржувачи, симпатизери или членови не оставија доволно силен впечаток за да бидат ангажирани како што биле претходно. И третиот неодминлив факт е заплашувачкото однесување од страната на власта, мешањето на државата со партијата по секој основ, изјави Милошоски.

Тој напомена дека во 27 години за прв пат имаме убиен носител на советничка листа, дека за прв пат имаме еден кандидат за градоначалник кој што седум дена е во болница со скршен череп, а треба да се натпреварува во втор круг.

-За прв пат имаме премиер кој што три години збореше дека премиерот не треба да биде политички и партиски активен 100 дена пред изборите,  а сега гледаме дека секој ден со неговите министри е дел од партиската кампања, особено со Министерството за внатрешни работи и Министерството за труд и социјална политика. За прв пат гледаме луѓе кои биле обвинети и за изборни нерегуларности и за тешки телесни повреди, одредени кражби, одредени криминали се ослободени, а дел од нив се активни на терен и прават логистика за одредени изборни нерегуларности, изјави Милошоски.

Тој кажа дека овие фактори севкупно влијаеа на изборниот резултат, но како и да е тој смета дека ВМРО-ДПМНЕ има доволно и капацитет, енергија и мотивирано членство.

-Сметам дека и граѓаните стануваат посвесни за тоа кој и на каков начин владее и се однесува, за да можеме во овие неколку дена што преостануваат, во вториот круг да го подобриме резултатот, изјави Милошоски.

Милошоски: ВМРО-ДПМНЕ секогаш ќе се залага за да ги застапува македонските национални и државни интереси

Човек не мора да е премногу политички искусен за да му е јасно дека господинот Заев не е поставен за премиер за да ја подобри економијата или да ги зголеми платите во здравството или да даде 10 илјади младинска гаранција на студентите. Тој е поставен затоа што е уценет и преку таа уцена со неговите зборови треба да ја свитка кичмата во однос по некои национални прашања за кои што ВМРО-ДПМНЕ држеше достоинствен став, потенцира Антонио Милошоски од ВМРО-ДПМНЕ.

-Немаме ништо против компромиси со соседите, но да не бидат само на наша штета. Затоа и за договорот со Бугарија ние и честитаме на владата во Софија како ги настапувала своите интереси, но не можеме да го кажеме тоа за владата во Република Македонија. Гледаме дека во соседна Грција главната анализа на договорот со Грција е начинот на кој што тој е склучен, без референдум во краток временски период со отстапки само од македонска страна и верификација од нашата влада. Сметаме дека ако кон еден сосед покажете таква попустливост затоа што сте уценет и ставен на премиерското место само за редефинирање на државата, тогаш логично е и другиот сосед и Албанија и Косово да го побараат истото од вас. И сега ние очекуваме Грција да притиска и да бара Македонија да биде страната која што ќе ги направи сите отстапки на своја штета, а еднаш се склучува договор и потоа истиот да трае следните 50 или 100 години, истакна Милошоски.

Тој додава и дека ВМРО-ДПМНЕ ќе се залага за застапување на македонските национални и државни интереси.

-Во однос на овие прашања треба да имаме една црвена линија преку која што без разлика на политичката припадност не треба да поминеме бидејќи решаваме прашања кои што влијаат и на државата и на сегашните и идните генерации. Треба да бидеме достоинствени како народ да се почитуваме и да имаме едно заедништво во националните интереси и така ќе не почитуваат повеќе и соседите. Ако девизата е да се свитка кичмата за да не сака соседот, тогаш Македонија ќе биде страната која секогаш ќе ја витка кичмата и нема да има никаков почит од соседите кои што си имаат свои интереси спроти нашата држава, вели Милошоски.

Милошоски: Неуставниот закон за јазици е тука за да рашири магла, за Анѓушев и Мерко да си ги покријат криминалите (ВИДЕО)

На денешната седница во Собранието каде точка на дневен ред е Законот за јазиците, говореше пратеникот на ВМРО-ДПМНЕ, Антонио Милошоски. Тој напомена дека меѓу другите, овој закон го предложиле вицепремиерот Кочо Анѓушев, министерот без ресор Рамиз Мерко.

Тој говореше зошто тие имаат потреба од овој закон, карање меѓу Македонци и Албанци, меѓу политички партии и стереотипи.

-Затоа што против господинот Мерко, сегашен министер, се води постапка за 6 милиони евра проневера за улично осветлување во Струга, наменски формирана фирма Сити Лајт, која што во моментот на тендерот, нема исполнето ниту еден од условите вреден 6 милиони евра, изјави Милошоски.

Тој напомена дека сега е поважно Мерко да им каже дека Антонио не ги сакал Албанците, а да се тргне курсот од неговиот криминал.

-Заедничкиот интерес на Анѓушев и Мерко е тендери, милиони, кеш и пари. Не потребата на граѓаните на Македонија. Овој неуставен закон е тука за да рашири магла, пред избори треба да се гласа, за да се направи политички пазар, не за да донесе поквалитетен живот, туку некој да си ги покрие криминалите кои што ги направил или што има намера да ги прави, изјави Милошоски.

Милошоски: Неуставниот закон за двојазичност се носи за да се прикрие корупцијата и неспособноста на функционерите на ДУИ

Пратеникот на ВМРО-ДПМНЕ Антонио Милошоски на денешната собраниска седница, истакна дека неуставниот јазик за двојазичност се носи за да се прикријат корупцијата и неспособноста на функционерите на ДУИ.

-Кој има потреба од носење на неуставен закон, дали имаат потреба некои пратеници кои што земале или не земале пари да гласат за ваков закон, дали тие пратеници се од СДСМ или не се тоа не знам, но едно знам дека ова не е потребата на граѓанинот Албанец, не е главната потреба. Знам дека ова е потребата на некој функционери Албанци за да ја покријат својата неспособност или корупција. Градоначалникот на Чаир Изет Меџити има земено 14% провизија за плоштадот Скендербег, 450 илјади евра има земено Изет Меџити, рече Милошоски.

Потребата на неуставниот закон не е за обичниот Албанец туку за да се покрие непособноста на функционерите на ДУИ.

-Потребата за овој закон е како Теута Арифи да покрие тоа што нејзиниот сопруг стана врховен судија, додека многу Албанци заминаа во странство да бараат леб. Како Изет Меџити зема 450 илјади евра за плоштадот Скендербег, како може еден градоначалник да земе пари и да се кити со нив. Потребата да се донесе неуставен закон има еден градоначалник кој што бугарска фирма градеше плоштад и истата префрли 450 илјади евра на фирма од Дебар, по  барање на градоначалникот Изет Меџити. Потребата е на Теута Арифи која што не успеа Албанците во Тетово да ги заштити од канцероген чад, потенцираше тој.

Милошоски на крајот истакна дека овој неуставен закон ќе падне на Уставен суд, но ќе предизвика кавга и нема да се збори за реалните потреби на Албанците во Македонија.

Милошоски: Денес здравството го води човек кој што не верува дека треба да е министер за здравство

Пратеникот од ВМРО-ДПМНЕ Антоиот Милошоски денеска од собраниската говорница истакна дека  здравството денес го води човек кој што не верува дека треба да е министер за здравство.

-Дали ова значи дека министерот за здравство во моментов не е ниту министер за здравство, ниту градоначалник или си води кампања на терен додека некој им говори на студентите по медицина дека имаме добар предлог кои што ќе подобри некои работи во здравството. Или пак министерот  Таравара кој на прес-конференција премиерот Заев кажа дека е многу задоволен од  неговата работа не верува дека овој предлог закон е добар или не е спремен да го брани или не го прочитал, истакна Милошоски.

Тој потенцираше дека во овие 100 дена од новата Влада можевме да се увериме каква неодговорност се случуваше во здравството.

Милошоски: Неуставниот закон на СДСМ и албанските партии води кон целосна двојазичност што ќе предизвика федерализација на Македонија

Законот кој СДСМ и албанските партии го предлагаат во оваа форма води кон целосна двојазичност, што ќе предизвика федерализација на Република Македонија. Овој закон не е уставен, истакна денеска пратеникот од ВМРО-ДПМНЕ, Антонио Милошоски на Комисијата за политички систем и односи меѓу заедниците, каде се расправа за Законот за употреба на јазиците.

Тој потсети дека албанските политичари Али Ахмети и покојниот Арбен Џафери по потпишување на Рамковниот договор сами истакнале дека не успеале да направат двојазичност зашто не успеале да го променат Уставот.

Милошоски образложи дека двојазичноста само ќе ја зголеми недовербата меѓу Македонците и Албанците, но ќе ја зголеми и дискриминацијата кај помалите етнички заедници.

Пратеникот од ВМРО-ДПМНЕ истакна дека овој закон не е договор меѓу Македонците, Албанците и сите други етнички заедници во Македонија, туку едноставно е договор меѓу СДСМ и ДУИ со кој сакаат пред изборите да ги прикријат неуспесите на ДУИ од изминатите години и сакаат законот да служи како компензација, замачкувајќи им ги очите на незадоволните граѓани, Албанци.

Милошоски истакна дека донесувањето на овој закон ќе повлече глоби, казни и санкции за секој суд, универзитет или која било друга установа која нема да ја спроведе двојазичноста.

Според него, овој закон се обидува да се протне во Собранието со европско знаменце, иако ниту една земја од Европа не побарала двојазичност како услов за членство на било која друга земја.

Милошоски: Пратениците на ВМРО-ДПМНЕ и Коалицијата утре ќе поднесат предлог закон за зголемување на пензиите, СДС да не го попречува

Пратениците на Коалицијата „За подобра Македонија“ утре ќе поднесат предлог закон во Собранието на Република Македонија за зголемување на пензиите за 650 денари на околу 300.000 пензионери во државата, информираше Антонио Милошоски, член на ИК на ВМРО-ДПМНЕ, на денешната прес-конференција.

-Доколку овој закон се усвои во Собранието до поддршка на уште само 10 пратеници покрај Коалицијата „За подобра Македонија“ тогаш од февруари идната година пензионерите ќе добијат 650 денари повеќе како што беше пракса додека ВМРО-ДПМНЕ раководеше со владата на Република Македонија. Со Предлог законот за дополнување на Законот за пензиското и инвалидското осигурување се предвидува во 2018 година за сите видови на пензии без разлика дали се повисоки или пониски согласно со овој закон да се усогласат на начин што вкупниот износ за исплата на пензиите од декември 2017 година ќе се зголеми за 5% и ќе се подели со вкупниот број на корисници на пензија кои што ја оствариле заклучно со декември 2017 година.

Ова е уште еден проект, рече Милошоски, еден предлог закон кој што беше ветување во нашата предизборна програма и сакаме да бидеме чесни кон граѓаните и пензионерите кои што гласале за Коалицијата „За подобра Македонија“, но исто така како што гласале и за други политички партии но очекуваат подобар животен стандард и да понудиме закон за повисоки пензии.

-ВМРО-ДПМНЕ во изминатите години од своето владеење ги зголеми пензиите на сите пензионери во државата. Најниската пензија се зголеми за 105%, значи ако се сеќавате 2006 година најниската пензија беше 4.330 денари, а 2016 година најниската пензија достигна 8.890 денари. Ако ги земеме просечните пензии, просечната пензија во 2006 година изнесуваше 7.680 денари, додека на крајот на 2016 година просечната пензија стигна до 13.750 денари. Затоа сметаме дека само со реално 5 процентно зголемување на пензиите може да имаме нивен раст. Влада предводена од господинот Заев продолжи онаму каде што застана во 2006 година, да манипулира дека прилагодувањето на пензиите значи нивно зголемување, без да покаже реален капацитет, буџетски капацитет и економски политики на реален начин да ги зголеми пензиите.

Пензионерите, додаде тој, во овој момент со право се чувствуваат изманипулирани и излажани, бидејќи ги знаат своите сметки, и ги знаат своите месечни приходи и пензии.

-Ги повикуваме пратениците од Социјал-демократскиот сојуз да не ги попречуваат пензионерите да го добијат она што стана како пракса во државата кое што покажа капацитет да ги зголемува пензиите за 5% до 2016 година. Се надеваме дека Социјал-демократскиот сојуз конечно ќе се охрабри и во Собранието ќе покаже конструктивност во интерес на сите граѓани. Она што посебно сакам да го истакнам е дека во овие комплицирани политички моменти во Република Македонија наместо да се гласаат неуставни предлог закони кои што го разделуваат и подвојуваат општеството како што е законот за двојазичност, подобро е да се гласаат уставни и корисни закони како што е предлог законот за покачувањето на пензиите бидејќи тоа ќе им користи и на пензионерите Македонци, Албанци, и Турци, и пензионерите Роми, Срби, Власи и Бошњаци и ќе им користи на нивните внуци, подвлече Милошоски и додаде:

„Кога станува збор за граѓаните на Република Македонија сметаме дека пратениците треба да покажат сплотеност по однос на интересот на граѓаните. Коалицијата „За подобра Македонија“ има 51 пратеник и за да помине законот за зголемени пензии со 5% реално покачување потребни се уште 10 пратеници. Ги повикуваме, доволни се само пратениците кои што исто така се кандидати за градоначалници господинот Шилегов, господинот Стефан Богоев, господинот Бочварски, Бетиан Китев, господинот Зеќири Ибраими, Зијадин Села и уште неколку други да го поддржат овој закон и пред пензионерите во нивните општини и градови каде што се кандидираат да покажат реална способност и волја да се покачи стандардот на пензионерите“.

Милошоски: Груби ги спаси пратениците на СДСМ од поединечно изјаснување за Законот за јазици

Пратеникот Антонио Милошоски на Комисијата за европски прашања побара поединечно гласање за Законот за јазици од сите членови на комисијата, но истото тоа не беше овозможено од страна на претседателот на комисијата Артан Груби.

Тој нагласи дека поединечното гласање го побарал со цел да види македонската јавност како ќе гласаат пратениците на СДСМ кои се членови на комисијата.

Исто така пратеникот нагласи дека е спорна бројката од 9 гласа ЗА кога евиденстно било дека За гласале само 7 пратеници.

Милошоски: Законот за двојазичност, предложен од марионетската Влада на Заев, не може да се покрие со злоупотребата на знамето на ЕУ

Антонијо Милошоски од ВМРО-ДПМНЕ на денешната седница на Комисијата за европски прашања побара да се повлече законот за јазици бидејќи, според него, „се злоупотребува европското знаме во партиски цели“.

„Европското знаменце е злоупотребено како „смоквин лист“ за да ја скрие неуставноста и немоќта на креаторите на законот да разговоараат со релевантните институции. Расправата на оваа комисија е класична политичка злоупотреба, затоа што предлог законот нема никаква допирна точка со акт на ЕУ, туку е резултат на политички договор“, рече Милошоски.

Тој дополни дека во ниту едее извештај од ЕУ двојазичноста не била критериум за членство на Македонија и дека опозицијта не е против да се дискутира за законот, туку е против неговото носење да биде злоупутребено.

Откако неговиот предлог беше одбиен, по него Илија Димовски побара за Предлог Законот за употреба на јазиците да се расправа прво на матичната комисија за политички систем.

„Комоцијата на тенкото мнозинство од 62 пратеници не е дозвола за кршење на процедурите. Сакаме да ги чуеме аргументите, зошто да се брза неговото донесување? Ние предлагаме сеопфатна дебата и решение што ќе ги задоволи сите, не само албанската туку и другите седум заедници во државата“, рече Димовски. Неговиот предлог исто така беше одбиен.

Комисијата во моментов е на пауза, по размената на остри зборови помеѓу Милошоски и претседателот на комисијата, Артан Груби, откако пратеникот на опозицијата се качи на говорницата, но претходно не доби право на збор. Милошоски продолжи да зборува, по што Груби ја прекина седницата.

Милошоски : Надворешната политика на Владата на СДСМ не ги штити и не ги застапува доволно националните интереси на Македонија

Во предизборната кампања имаше една изјава која што сите сметавме дека е несреќна изјава но изгледа е  нов принцип на новата влада во надворешната политика кога господинот Заев кажа дека република Македонија треба да ја свитка кичмата односно р’бетот за да постигне одредени цели во надвоешната политика вели Антонио Милошоски член на извршениот комитет на ВМРО-ДПМНЕ.

-Кога давате таква изјава и ако таквата изјава е појдовен принцип во надворешната политика на владата тогаш сите оние кои што во надворешната политика имаат некаков однос кон вас или некаков интерес секогаш ќе очекуваат ваше виткање на кичмата односно р’бетот за да постигнат подобар исход на нивните национални интереси наспрема интересот кој го има Република Македонија, рече Милошоски.

Милошоски потенцира дека прв исход од таквата наворешна политика беше склучувањето  на штетниот договор за добрососедство и соработка со република Бугарија.

– Договорот не е проблем кога се склучува со други држави. Но кога едната страна остапува од сите свои национални интереси за сметка на придобивките и повластиците на другата страна тогаш таквиот договор е штетен. Ние со бугарија имавме декларација од 1999 година која по опсег беше многу во потесни рамки од договорот што го потпишаа Заев и Борисов, и втора работа што треба да ја знаат граѓаните е дека декларацијата има незадолжителен карактер, вели Милошоски.

Тој потенцира дека разликата помеѓу декларација и договор е во тоа што сега се има обврски кои треба да се исполнат и дека секое непочитување на овој договор ќе ја предизвика Бугарија утре ден да не блокира на патот кон евроинтеграциите. Според Милошоски надворешната политика на владата предводена од СДСМ не ги штити доволно и не ги застапува доволно националните интереси на Репблика Македонија во однос на оние соседи или регионални партнери и земји со кои имаме некои прашања кои треба да ги затвориме.