Заев и неговите колеги од Владата со пари на државата си купуваат брендирана облека и скапи подароци

Зоран Заев и владините чиновници на службените патувања се луксузираат со народните пари. Нашите извори говорат дека на службените патувања Заев и неговите придружници покрај тоа што уживаат во благодетите кои ги нудат најскапите хотели и на богати ручеци, тие државните пари не ги штедат ниту за купување на брендирана облека и скапи подароци.

Владините чиновници на овие службени патувања купуваат облека, обувки и парфеми од најпознатите и најскапи светски брендови, трошејќи илјадници евра од парите на граѓаните. Како што дознаваме државните пари не ги трошат само за себе туку редовно на секое патување се трошат илјадници евра на скапи подароци за членовите на нивните семејства и пријателите.

Тие престојуваат во скапи хотели со по 5 ѕвезди каде уживаат во благодетите кои ги нудат како што се затворен базен, спа центри, фитнес центар па дури и сопствено кино. Посебно внимание посветувале на изборот на ресторани. Така соработниците на Заев на овие службени патувања ручаат и вечераат во најлуксузни угостителски објекти, а сметките за нивните гозби граѓаните на Република Македонија ги чинат илјадници евра.

Се почесто се зборува дека служените патувања се само маска да може Зоран Заев со народните пари да награди што е можно повеќе негови соработници кои секојдневно му помагаат во матните зделки и криминалите.

СÈ ЌЕ ПОСКАПИ: Владата ќе го полни буџетот преку масовно зголемување на акцизата на дериватите на штета на граѓаните

Од 1 јануари Владата планира да ја зголеми акцизата на нафтата за три денари. На овој начин, доаѓа до сериозно поскапување на цената на дериватите со што на грбот на граѓаните, Владата на СДСМ ќе си го полни Буџетот.

Со зголемување на акцизата и ДДВ-то цената на дизелот ќе биде повисока за 3,5 денари. Ова го соопшти министерот за финансии Драган Тевдовски на денешната јавна дебата на која се претставува Предлог-буџетот за 2018 година.

Министерот од СДСМ оцени дека и покрај зголемувањето на цената, таа сепак ќе била пониска во однос на регионот, но не им објасни на граѓаните дека ова ќе значи поголем дополнителен трошок токму за нив.

Очекуваниот ефект од зголемување на акцизата во Буџетот за 2018 година кој денеска го претставуваат во Министерството за финансии ќе изнесува 1,6 милијарди денари, а од ДДВ-то 350 милиони денари. Владата предводена од Зоран Заев наоѓа секакви начини за да го наполни Буџетот на терет на граѓаните.

И долгогодишниот новинар Горан Теменугов, преку својот Фејсбук профил, оцени дека акцизата на дериватите ќе се зголеми за да има повеќе пари во Буџетот.

Милион и пол евра префрлени на сметките на шарените и невладините пред изборите

Околу 94.827.136 денари или 1.541.905 евра, државни пари беа префрлени на сметките на невладините организации од 7 август до денес.

На крајот од предизборната кампања, за промоција на политиките на социјалдемократите, само за еден ден, на 26.10.2017 година, невладините зедоа речиси половина милион евра од државниот буџет кој сите ние го полниме.

Покрај парите на фондацијата Сорос, кои изнесуваат околу 4 до 5 милиони евра годишно, невладините се финансирани и од страна на државата во сличен износ, меѓутоа, тие (НВО) бараат уште поголема државна помош, а од Владата одговорија дека ќе има „плодна година“.

Финансирањето на граѓанските организации, вкупно по сите основи од државниот буџет, е на ниво од четири до пет милиони евра годишно, што е исто колку што дава и фондацијата СОРОС… Мора да се зголеми државното финансирање, за да нема повеќе обвинувања дека невладините се поддржани од странство, бидејќи тие всушност треба да се финансираат од државниот буџет, вклучувајќи ги и критички настроените, изјави Александар Кржаловски од МЦМС.

Со изјава и генералниот секретар на Владата на Република Македонија, Драги Рашковски.

Да се надеваме дека ќе имаме многу успешна буџетска година која ќе ни дозволи тие средства да се покачат, вели Рашковски.

За почеток на владеењето на СДСМ невладините се опарија 10 пати повеќе

Наместо вложувања и реализација на капитални проекти и добра кои ќе обезбедат повеќекратни сегашни и идни користи, парите на и онака аномаличниот буџет ќе продолжат да се трошат на шарени револуционери, невладини организации и на останати непродуктивни проекти.

Колку за споредба, невладините, од државниот буџет, примија 10 пати повеќе пари од вкупната вредност на сите префрлени субвенции на приватни претпријатија за периодот од 7ми август до денес.

Непродуктивните трошења продолжуваат и по други основи. За стоки и услуги, во погоре опфатениот интервал (07.08. -27.10. годинава) новата Влада потроши повеќе од 125 милиони евра. Државата нема пари за покачување на пензии, за градење на автопати, болници, училишта, итн., но има за ангажирање на шарени активисти и за партизирање на невладиниот сектор.

Македонија беше единствената земја каде што можеше бесплатно да си купиш боја, и плус, ако претходно ги оштетуваше државните објекти, сега ќе си земаш пари од државата.

Анѓушев потврди дека ќе се зголемуваат даноците и ја потцени интелигенцијата на граѓаните

Вицепремиерот за економски прашања, Кочо Анѓушев денеска потврди дека ќе се зголемуваат даноците, притоа потценувајќи ја интелигенцијата на граѓаните со тврдење дека таквото зголемување на даноците немало да биде на штета на граѓаните и на бизнисте.

Измената на даноците нема да биде на штета ниту на граѓаните ниту на бизнисите. Било какви измени на даноците да се донесат ќе бидат во прилог на граѓаните и стопанствениците, рече денеска Анѓушев на отворањето на саемската манифестација „Технома“ на констатацијата дека стопанствениците и граѓаните веќе реагираат дека не се консултирани за овие предлози и дека некои од нив ќе бидат дополнително оптоварување за нив.

Ваквата изјава на Анѓушев доаѓа само неколку дена откако премиерот Зоран Заев потврди дека даноците ќе се зголемуваат.  Имено Заев, во гостување на радиоемисијата „Стадион“ на Канал 77 изјави:

Продолжуваме со децентрализацијата на власта, едниот дел е фискалната децентрализација, мора да ја продолжиме. Веќе размислуваме заедно со УЈП и министерството за финансии за нови давачки, да бидат допрецизирани, кои ќе го зголемат финансискиот ресурс на општините.

Пред локалните избори, претседателот на ВМРО-ДПМНЕ, Никола Груевски напомена дека во програмата на Социјалдемократскиот сојуз е предвидено зголемување на даноците и потенцираше дека зголемувањето на даноците ќе има повеќекратни штети врз економијата.

– Информиран сум дека планираат зголемување на данокот на добивка и придонесите и дека тоа планираат да го прават постепено, а не одеднаш. За да не ги шокираат граѓаните од еднаш со поголемо зголемување на повеќе даноци, зголемувањето ќе биде постепено за луѓето да имаат можност помалку да го почувствуваат тоа.

Дел од провладините медиуми денеска излегоа со информации дека Владата разгледува опции за интервенција во насока на фискална консолидација, со кои се бара начин како и од каде да се покрие хроничниот недостиг од пари. Се размислува за поволни странски позајмици во комбинација со зголемување на даноци. Во консултација со експерти веќе се разгледуваат повисоки придонеси, повисок данок на добивка, па дури и повисок данок на додадена вредност.

Експерти кои се вклучени во изнаоѓењето решенија веќе најавија дека се размислува за зголемување на ДДВ за 2 до 3 отсто со што би се обезбедил добар прилив на пари во буџетот, а последиците би биле минимални бидејќи би се зголемиле цените на некои производи, а други би останале на исто ниво.

Дел од експертскат јавност веќе предупредуваше дека сиромаштијата во Македонија ќе се дуплира со покачувањето на даноците кое е најавено до крајот на годината. Зголемувањето на даноците само ќе го забрза крахот на економијата и ќе предизвика осиромашување на граѓаните.

Најавеното зголемување на даноците може да предизвика сериозни последици, како за економијата, така и за вработеноста и стандадот на граѓаните. Граѓаните стравуваат дека покачувањето на даноците  може да предизвика негативни последици кои ќе доведат до осиромашување на народот, а со тоа и до зголемено незадоволство.

– Зголемените даноци значат сериозно загрозување на пред се помали фирми и претпријатија во Република Македонија кои ќе се доведат до работ на егзистенција. Ваквата ситуација може да предизвика евентуално даночна евазија, што ќе се одрази на ликвидноста на буџетот, од кој зависи изградбата и реконструкцијата на училишта, болници, градинки, патишта, водоводи и канализации, велат  од „Граѓанското движење против осиромашување“.

Тие предупредуваат дека од друга страна, сопствениците на фирмите со цел да го задржат профитот може да се одлучат за намалување на платите или отпуштање на работници, што ќе предизвика намалување на стандардот на семејствата во Македонија и нивно доведување до работ на егзистенцијата.

-Најавите за на Владата за ваков чекор доаѓаат без реална основа, анализа и проценка, а најмалку од се има издржана дебата, во која сите субјекти, експертите, работодавачите и синдикатите, но пре се граѓаните ќе може да го кажат своето мислење за вака сериозна тема. Штетите од неоправданото и неиздржаното зголемување на даноците повеќекратни и затоа ние стравуваме дека најлошо ќе се одразат на грбот на обичниот човек кој вредно работи а да обезбеди иднина за себе и за своите деца, велат од граѓанското движење.

Дојче веле: Новите мерки на Владата нов удар за бизнисмените, зголемени придонеси, даноци и зголемување на ДДВ за 2 до 3%

Повисоки придонеси, зголемување на данок на добивка, па дури и на ДДВ? Фискалната консолидација наметнува болни мерки, но неизвесно е кои од нив ќе станат и реалност. Експертите се поделени, бизнисмените загрижени, анализира Дојче Веле.

Поволни странски позајмици во комбинација со зголемување на даноци – Владата сериозно ги разгледува опциите кои ѝ стојат на располагање за интервенција во насока на фискална консолидација.

Според информации на Дојче веле, во консултации со експертската јавност веќе се разгледуваат неколку опции. Клучната дилема околу која се кршат копјата е кое од решенијата да се примени веќе со наредната фискална година. Во игра се повисоки придонеси, поголем данок на добивка, а на маса е ставен и предлог за зголемување на данокот на додадена вредност:

„Во игра се неколку опции, а на маса е и прашањето за данокот на додадена вредност. Евентуално да се оди на зголемување на ДДВ за 2 до 3% со што би се обезбедил сериозен прилив на финансиски средства со кои би се покриле огромните буџетски дупки. Ефектот од ова би бил голем, а последиците минимални. Некои производи ќе поскапат незначително, а дел и ќе останат со исти цени. Сѐ ова засега е на ниво на идеја и предлог, но нешто мора да се менува бидејќи пари нема“, открива за Дојче веле експерт вклучен во целиот процес.

Непопуларните мерки се неопходни!

Клучната дилема според него е дали, колку и од кога да се корегира персоналецот и данокот на добивка. Интервенциите можеби се непопуларни, но се неопходни за подобрување на состојбите:

„Апсолутно се потребни непопуларни мерки, како на пример онаа за ДДВ. Или ќе имаме сериозен и храбар министер за финансии или повторно нема да се обезбедат ефикасни политики кои ќе генерираат развој и ќе ги покријат дупките. Па само годишно во Фондот за пензиско се префрлаат по 500 милиони евра, што е трагедија. Се протежира персоналецот да се зголеми на 18%, но тврдам дека оваа мерка ќе демотивира и нема да го даде посакуваниот ефект. Ако сакаат екстра пари минимално нека не ги чепкаат персоналецот и данокот на добивка, или максимум до 12%, но не од наредната година, туку евентуално од 2019-та, коментира тој за Дојче Веле.

ЛАГИТЕ ИЗЛЕГОА НА ВИДЕЛИНА: Нема пари за исплата на минималната плата, но нема пари ни за плати пред избори

Наспроти предизборните популистички ветувања дека работниците ќе добијат зголемена септемвриска минимална плата, фактичката состојба покажува дека Владата предводена од Зоран Заев, односно Министерството за финансии нема пари за исплата на минималната плата, ветување кое пред локалните избори како мерка беше донесена од страна на новата влада.

Според известувањето од Министерството за финансии до другите министерства и институции, кои потоа ги известиле своите финансови служби, од нив се бара септемвриската минимална плата да биде подготвена без примена на Законот за изменување и дополнување на законот за минимална плата, односно без зголемување на минималната плата која во бруто износ требаше да изнесува 17.130 денари.

„Почитувани, Ве известуваме дека платата за месец 9/2017 треба да ја подготвите без примена на Законот за изменување и дополнување на законот за минимална плата во Република Македонија (Службен весник на РМ бр.132/2017 година) , односно без зголемување на минималната плата која во бруто износ требаше да изнесува 17.130 денари.Насоките се добиени од Министерство за финансии во текот на вчерашниот ден (9.10.2017 година). Значи, треба да доставите нова декларација и пресметка на плата без зголемување на минималната плата“, се вели во дописот.

Ова значи дека септемвриската исплата на минималната плата, која работниците требаше да ја добијат зголемена, е само предизборен трик на новата власт предводена од Зоран Заев. Со насоките добиени од Министерството за финансии, декларацијата и пресметката за ветената зголемена плата за септември, финансовите служби треба да ги направат без зголемување на минималната плата.

„Во Законот за минимална плата во РМ е предвидено исплатата на минималната плата да се врши со септемвриската плата“, изјавија во понеделникот од Министерството за труд и социјална политика.

Ова практично значи дека Министерството за финансии признава дека пари за исплата на минимална плата нема, а граѓаните и работниците се само жртви на уште една предизборна измама на новата влада.

Не само за минималната плата, пари нема ниту за платите во институциите од културата пред 15 септември.

-За прв пат по 11 години нема да примиме плата до 15-ти во месецот. Министерството за финансии не ни ја прима апликацијата за плати и велат да се однесе после избори, ни рекоа во една институција од областа на културата.

Владата објави јавна набавка: Се купуваат ли двојазични униформи за полицијата?

На вчерашната седница Владата усвои информација за потреба од набавка на униформи за припадниците на полицијата.

Владината прес-служба соопшти дека Владата го задолжила Министерството за внатрешни работи да поднесе барања за добивање согласност до Советот за јавни набавки за спроведување јавни набавки за повеќе делови од униформата за припадниците на полицијата.

Со оглед на тоа што во изминатата година беа набавувани нови униформи, јавноста се сомнева дека со оваа одлука е наменета за купување на нови, двојазични униформи, кои се предвидени со новиот закон за јазици. Според договорот помеѓу СДСМ и ДУИ, униформите на полицијата треба да бидат напишани и на македонски и на албански јазик.

-Во врска со оваа точка, Владата донесе одлука да му се укаже на Советот за јавни набавки, поднесените барања од Министерството за внатрешни работи во однос на униформата за полицијата, согласно закон да ги разгледа во пропишаниот рок и да донесе одлуки во рамките на утврдените законски надлежности, стои во соопштението. – стои во соопштението на владата.

По предизборните инциденти, ЕУ од Владата бара фер и демократски избори

Портпаролката на Еврокомисијата, Маја Коцијанчич побара од актуелната македонска Влада и сите институции да обезбедат услови за слободни избори.

По неколкуте инциденти во кампањата за локалните избори во Република Македонија, што резултираше со синоќешниот напад врз актуелниот градоначалник на Шуто Оризари и кандидат за нов мандат, Елвис Бајрам, денеска со реакција излезе и Европската комисија.Портпаролката на Еврокомисијата, Маја Коцијанчич побара од актуелната македонска Влада и сите институции да обезбедат услови за слободни избори.

– Пред локалните избори во земјата, ние ги охрабруваме сите претставници на политички партии да постапуваат одговорно. Исто така, ги повикуваме сите институции да обезбедат услови за веродостоен и транспарентен изборен процес, што ќе им овозможи на сите граѓани слободно да ги остваруваат нивните демократски права – порача Коцијанчич.Од претходно е кажано дека, покрај исполнување на бараните реформи од ЕК, во рамки на Итните реформски приоритети за Македонија, за отстранување на условеноста на препораката за отворање на преговорите за членство на Македонија во Европската унија, официјален Брисел инсистира и на одржување фер и демократски локални избори, на кои сите партиципиенти ќе имаат услови за фер изборен натпревар на кој граѓаните слободно и без притисоци ќе го дадат својот глас.

ПРОПАСТ НАМЕСТО ЖИВОТ: Граѓаните добија беда и сиромаштија, животот дојде само за функционерите на СДСМ

Државата со СДС оди кон пропаст. Животот кој го ветуваа дојде, само за функционерите на СДС и пајташите на Заев, за сите останати е беда и сиромаштија. Владата нема план, уште помалку волја да решава проблеми. За само 4 месеци, СДС ја доведе македонската економија пред колапс, велат од ВМРО-ДПМНЕ.

Во партиското соопштение се вели дека неспособното раководство на СДС на чело со Зоран Заев, за краток период додека се на власт, успеа државата да ја доведе на работ пред банкрот.

-„Планот за живот” на СДС на граѓаните им ветуваше просечен раст на економијата од 5% годишно, но наместо тоа само за првите четири месеци имаме пад на бруто-домашниот производ за 1,8%. Ветуваа просечна плата од 500 евра, но лошите економски политики кои ги водат, допринесоа за пад на просечната бруто плата два месеци по ред. Трошењето на 420 милиони евра пари граѓаните на ветер и магла, а не на реални и развојни проекти за државата, резултираше и со пад на индустриското производство за 5.3%, и пад на извозот за 12%, што суштински резултира со помалку пари за компаниите и индиректно значи помалку нови работни места и повисоки плати за работниците, се вели во партиското соопштение.

Од партијата велат дека помалку профит за компаниите, директно повлекува помалку пари во касата на државата за нови инвестиции кои ќе го подобрат животот на граѓаните. Помалку пари за нови болници, нови градинки и нови патишта.

-Политиката на намерно блокирање на изградба автопатите и други, капитални инвестиции, само затоа што започнало да ги гради или изградило ВМРО-ДПМНЕ, имаше влијание и на двоцифрен пад на производството во градежниот сектор кој е еден од главните двигатели на македонската економија, од кој зависат вработувања на илјадници и илјадници градежни работници. Деструктивната политика која СДС и Заев ја имаа кон странските инвеститори, донесе нула нови странски инвестиции, пад на директните странски инвестиции за 100 милиони евра и ги натера инвеститорите да размислуваат да си одат од државата, се вели во партиското соопштение на ВМРО-ДПМНЕ.

Од таму велат дека севкупната лоша економска состојба во државата се одрази и на работењето на банките, каде Народната банка констатираше пад на активноста на банките за 1.6%,што значи дека компаниите се помалку бараат кредити, но и се потешко добиваат кредити.

-СДС ветуваше „Живот за сите” повеќе пари за сите во нивните семејните буџети, но донесоа само поголема сиромаштија за сите граѓаните во државата. Економскиот пустош кој и го направија на државата, граѓаните го чувствуваат на своја кожа и поради ваквите неодговорни политики, СДС ќе биде убедливо поразен на претстојните локални избори, се вели со соопштението на ВМРО-ДПМНЕ.

Србов: Со милионски суми Владата купува гласови за локалните избори (ВИДЕО)

Владата предводена од Социјалдемократскиот сојуз продолжува со финансирањето на невладините организации за време на предизборен процес, обвинува Никола Србов член на ИК на ВМРО-ДПМНЕ.

– Милионските трансакции кои се одвиваат последниве денови отвораат сомнеж дека владата со парите на граѓаните купува гласови во пресрет на локалните избори. За само два дена од парите на граѓаните на сметките на невладините организации се префрлени 29.660.000 денари. На 26-ти септември на сметките на невладините организации се префрлени 16.450.000 денари. Утредента, на 27-ми септември на сметките на невладините организации се префрлени 13.210.000 денари. Претходно, во периодот откако се распишаа локалните избори, на сметките на невладините организации беа префрлени вкупно 26.125.000 денари. Со најновите трансакции, невладините организации кои учествуваа во т.н. шарена револуција и кои по насилен пат ја уриваа легално избраната влада предводена од ВМРО-ДПМНЕ, од парите на граѓаните добиле вкупно 55.785.000 денари. Владата има обврска да им соопшти на граѓаните каде се трошат нивните пари. Преплетеноста на работата на невладините организации со партиските активности на Социјалдемократскиот сојуз, носи до заклучокот дека сега Социјалдемократскиот сојуз си ја финансира својата кампања и поткупува гласачи со пари на граѓаните, порача Србов.

Тој потенцираше дека ваквото самоволие, беззаконие и злоупотреба на парите на граѓаните ќе заврши на 15-ти октомври.