Груевски: Ова што го работи СЈО е незаконски – целта е да се оттргне вниманието од основните проблеми со кои се соочува државата и граѓаните

Ова што го работи СЈО е незаконски, бидејќи нивниот мандат е одамна истечен и овие предистражни постапки што ги водат практично се малтретирање на граѓаните во услови кога тие не може да поднесуваат никакви обвиненија или практично работат незаконски, изјави поранешниот премиер и лидер на ВМРО-ДПМНЕ Никола Груевски по денешниот распит во Специјалното јавно обвинителство.

– Денеска бев поканет од СЈО во својство на сведок за некоја нивна, како што кажаа прдистражна постапка. Им укажав дека ова што го работат е незаконски, дека нивниот мандат е одамна истечен и дека овие предистражни постапки што ги тераат практично се малтретирање на граѓаните во услови кога тие не може да поднесуваат никакви обвиненија или практично работат незаконски, рече Груевски.

Но, како што додаде, за да не излезе дека одбегнува дошол да го каже своето мислење и да одговори на некои прашања.

– Мислам дека ова го прават со цел да сум тука пред вас да ја дадам оваа изјава. Наместо да се зборува за она што случува во државата, за она што се зборува за промена на името од страна на Заев, наместо да се зборува за профункционирањето на ветените 100 илјади денари плата за лекарите или 500 евра просечна плата, за скандалозниот договор со Бугарија или пак, да се зборува за двојазичноста која што СДСМ ја промовира во Парламентот, да се зборува за тоа дека јас сум бил повикан во СЈО и дека сум дал изјава како сведок, рече Груевски.

Според него, „сето ова е политички со цел да се оттргне вниманието од основните проблеми со кои се соочува државата и граѓаните, да се зборува за минатото и на да се замае јавноста“.

– Членот 12 алинеја 2 од Законот за кривична постапка е многу јасен, дека незаконски прибавени аудио или видео сметки, не може да бидат доказ во судска постапка, ниту по нив да се изведуваат докази. Со оглед дека се работи за предистражна постапка мислам дека законски не смеам да соопштувам, изјави Груевски по распитот во СЈО.

Средба Груевски-Мета: Притворот за Едмонд Темелко е доказ за политички притисок и нечовечки третман

Претседателот на ВМРО-ДПМНЕ Никола Груевски денес заедно со генералниот секретар на ВМРО-ДПМНЕ Христијан Мицкоски и членот на извршниот комитет на ВМРО-ДПМНЕ Александар Николоски оствари средба со претседателот на Република Албанија Илир Мета.

На средбата се разговараше за македонско албанските односи, за актуелната политичка состојба и за стратешките приоритети на Република Македонија.

Соговорниците ги реафирмираа заложбите за отворена економска и политичка соработка меѓу двете држави базирана на принципиелна основа.

Груевски посочи дека во поглед на остварувањето на приоритетот за влез во НАТО значајна е поддршката на сите земји членки на алијансата вклучително и поддршката на Република Албанија, а воедно тој посочи постојат заеднички предизвици за напредок на патот кон Европската Унија, во чие надополнување соработката е добредојдена.

Воедно Груевски запознавајќи го својот соговорник за актуелните случувања во државата го отвори и случајот со притворот на Едмонд Темелко кој е единствениот Македонец по потекло градоначалник во Република Албанија. Тој истакна дека одлуката за притвор е резултат на политички притисок и не е заснована на правни принципи. Воедно Груевски изрази загриженост за неговата здравствена состојба која е влошена, и која е доказ за нечовечко однесување и постапување спрема човекот кој е борец за човекови права и градоначалник во општина во Албанија.

Груевски посочи дека од соседните држави треба да се очекува политика на заемно почитување и придонес за зајакнување и исполнување на приоритетите. Таквата политика ќе доведе до релаксирање на атмосферата и градење на доверба која е потребна за економски и политички напредок на регионот. Занимавањето и потенцирањето на етноцентристички теми и идеи не придонесуваат за развој на добра атмосфера и меѓусебна доверба.

Груевски: Крајната цел е името – Дојде тоа време Заев договара ново име на државата

Претседателот на ВМРО-ДПМНЕ Никола Груевски пред речиси еден месец предупредуваше дека крајната цел со носењето на Зоран Заев и СДСМ е власт е промена на името на Република Македонија Груевски нагласува дека власт на СДСМ е марионетска, донесена од други од надвор, а историјата покажува дека секоја марионетска власт има краток век на живот.

-Заев е донесен да изработи промена на името и идентитетот, а сега сето ова се прави за да му се даде подлога дека има легитимитет меѓу луѓето, со поткуп и со присилни гласови, се со цел да му дадат легитимет и храброст да продолжи во ветеното понатаму. Целта на сето ова што ни се случува е промена на името на државата, јазикот, нацијата, промена на идентитетот. Тој всушност зборуваше за редифинирање на државата, тоа се шест точки. Првата точка е промена на името и идентитетот, втората точка е договорот со Бугарија, третата точка е носење на мигранти во Република Македонија и нивно доселување тука, четвртата точка е двојазичност на цела територија со неуставен закон, петтата точка е зголемување на даноците и шестата точка е редифинирање на бракот, тој да не е заедница на еден маж и една жена, туку да се легализираат хомосексуалните бракови и да им се даде можност да посвојуваат деца, изјави Груевски.

Заев од Словенија го потврди она што Груевски го кажуваше. Тој од Словенија порача дека Македонија влегува во обид, кој што, како што кажа, ќе биде последен, со конечна цел, решавање на проблемот кој што Грција го има со нашето уставно име.

НА ПРЕДАВНИКОТ МУ СЕ БРЗА: Заев се надева дека конечно ќе го смени името

Груевски: СДСМ се махери за да и наштетат на државата – Поради овие шест цели СДСМ е донесен на власт (ВИДЕО)

Промена на името и идентитетот е главната цел поради која СДСМ се донесе на власт откако во декември ги изгубија изборите, порача лидерот на ВМРО-ДПМНЕ, Никола Груевски вечерва од Зрновци.

Тој вели дека постојат најмалку шест цели поради кои партијата на Заев стана власт во Македонија.

-Втората цел е договорот со Бугарија. Третата цел е да ја населат Македонија со мигранти, ние немаме ништо против тие луѓе, имаат мака, кога поминуваа низ Македонија им се помагаше, но ниту тие сакаат да се тука, ниту ние можеме економски тоа да го поднесеме. СДСМ да се покажат пред некои други премиери и претседатели дека се добри, прифатиле да донесат огромна бројка на мигранти тука, да ги населат, да им дадат државјанство и трајно да живеат во Македонија. Четвртата работа е законот за двојазичноста кој е неуставен и го туркаат таков неуставен. Петтата работа е зголемувањето на даноците за кое ќе видите како ќе се почувствува, истакна Груевски.

Според него, шестата работа поради која СДСМ е донесена на власт, е создавање на атмосфера понатаму да има легализација на хомосексуални бракови и посвојување на деца од страна на тие парови.

Груевски: СДСМ спроведе избори со поткуп и закани, горди се дека ќе ги зголемат даноците

Имате кандидат кој е проверена работа, човек кој што знае да работи, човек кој што сака да работи, човек кој се докажа, човек кој го градеше своето работно искуство и во Скопје, во рамки на министерството за образование, истакна лидерот на ВМРО-ДПМНЕ, Никола Груевски во Македонска Каменица.

-Дарко во последниве години направи многу проекти за кои вие сте свесни. Тој ја исполни програмата целосно 100 %, а и многу повеќе од тоа. Каменица доби одличен градоначалник, нема простор да се размислува за нешто друго, нема простор за експерименти. Имате човек кој знае да работи и многу ја сака оваа општина, кој ги сака овие луѓе. Тој се покажа во минатиот период. Со негова соработка се издејствува концесиите од рудникот да доаѓаат во буџетот на општината и со тие пари да се инвестира за поквалитетен живот тука за вас. Навистина, било кој експеримент ќе биде лош затоа што имате таков солиден градоначалник што било каква друга одлука ќе биде голема грешка и непоправлива понатаму, им порача Груевски на граѓаните на Македонска Каменица барајќи ја од нив поддршката за кандидатот за градоначалник Дарко Митевски.

Груевски посочи дека актуелната власт изминатиов период втерува страв, покажува агресија, ја злоупотребува полицијата.

-Со тоа беше одбележан првиот круг од изборите на кој многу граѓани беа заплашени и имаше многу поткуп. Тоа беше една димна завеса за да не се види реалната слика во која живее народот. Погледнете како овие 5 месеци додека се на власт повеќе нема проекти, не се зборува за економски достигнувања или за некои нови инвестиции. Нема веќе нови спортски сали, нема нови училишта, нема фабрики, нема водоводи, нема нови канализациски мрежи. За пензионерите кои ги измамија и за нови проекти во земјоделието и да не зборувам. Не само што нема, туку и почнаа да кратат субвенции најавувајќи дека од следната година тој што има помали приноси нема да добие субвенции. Го укинаа покачувањето на пензиите. Не само што нема нови проекти туку нема ни во најава проекти. Немаат нов проект, а ги кочат тие што ние почнавме да ги градиме. Покажаа дека се неработници. Згора на се без срам, се фалат дека ќе ги зголемеле даноците. Јас знам  едно време и ние се фалевме дека ќе ги намалиме и ги намаливме даноците, ама да се фали Владата дека ќе зголеми даноци тоа не можам да го разберам. Денес слушнав изјава на потпретседателот на Владата, Анѓушев, вели дека „зголемувањето на даноците нема да биде на штета ниту на граѓаните ниту на компаниите, дури и од корист ќе им било“. Јас такво нешто не сум чул можеби човекот да конкурира за некоја Нобелова награда, некоја нова теорија е ова. Во светот паѓаат влади која ќе најават зголемување на даноци и кога ќе ги зголемат. Во Македонија, Владата се гордее дека ќе ги зголеми даноците. Дека ќе плаќате персонален данок повеќе што значи дека од вашата бруто плата ќе оди повеќе за државата, а помалку за вас. Дека можеби и ДДВ ќе се зголемува што значи дека цените ќе се зголемат, дека данокот на добивка може да се зголеми, тоа значи фирмите во кои работите профитот кој ќе го направат ќе им се намали и наместо да ви ги зголемат платите тие пари ќе ги дадат на државата. И со тоа се гордеат, посочува Груевски.

Тој потенцира дека откако СДСМ е на власт нормалното станува ненормално, а ненормалното-нормално.

-Видовме како спороведуваат избори. Нема да зборам само за пукнатиот череп на градоначалникот на Шуто Оризари, за убиениот носител на советничка листа, за искршените штабови, за измислените кривични пријави против градоначалниците. Ќе ви пренесам едно искуство од она што се случува сега на терен. Илчо Захариев од Штип ми вели „Се борам против цела Влада и цела полиција. Ме следат и првиот ден после првиот круг ми упадна финансиска полиција“. Го следат секој ден со цивилни коли, им влегуваат по домовите кои тој ќе ги посети. И методот е ист, ако не успее поткуп, следува закана или уцена. Тони Трајковски од Гази Баба ми вели „Со денови еден ист човек дели пари во Јурумлери и околните населени места. Среде бел ден и мака си нема. Пријавив во полиција, нема реакција. Ги информираме набљудувачките мисии, но тие се неми“. Во Новаци им се заканувале дека ќе ги избркаат од РЕК Битола, а во скопски Бутел полицијата, активистите на СДСМ и криминалното подземје се едно исто исповрзани и во најголемо партнерство. Тоа е слика во скоро секоја општина каде има избори во вториот круг. Така беше и во првиот круг, порача Груевски.

Освен за политичката ситуација, Груевски пред граѓаните на Македонска Каменица говореше и за проектите од новата програма со која ја бараат довербата.

Во 2006 година кога дојдовме на власт во Македонска Каменица работеа околу 800 луѓе, а заклучно со 2016 година вработеноста во Каменица изнесувала 1.800 вработени и ова е зголемување на вработеноста за 120 проценти, вели лидерот на ВМРО-ДПМНЕ на вечерашниот митинг во Македонска Каменица.

-Вака се работи, а не да се продава ветер и магла и живот, треба да се обезбеди работа, квалитетен живот плата како и услови за живеење и развој за семејството. По победата на овие избори за учениците од прво до петто одделение ќе се обезбеди бесплатен здрав оброк кој ќе го финансира општината, а на тој начин родителите ќе добијат растеретување на нивните буџети. Општината и градоначалникот Дарко Митевски ќе обезбедат можности за стекнување на граѓаните со сопствен дом за оние кои што го немаат по симболична цена за само едно евро за квадрат, а ќе се укинуваат и трошоците и комуналиите за градење на куќи. Освен тоа ќе се отпишуваат и долговите за социјално ранливите категории заклучно со септември 2017. Нудиме концепт во кој ќе нема неосветлена и неасфалтирана улица и каде ќе има парк во секое маало, а ќе се изградат нови и ќе се реконструираат постоечките улици, потенцираше Груевски.

Тој додава и дека ќе се изгради и пречистителна станица на Каменичка река, а ќе се изградат и нови водоснабдителни системи во  руралните средини, а ќе се реновира и училиштето „Свети Кирил и Методиј“ и ќе се отвори нова детска градинка.

Груевски: Главната алатка на СДСМ не е да ги чујат потребите на граѓаните, туку да ги заплашат со полицијата

Овие денови сме сведоци на една специјална психолошка војна. Втеруваа страв на сите страни, заплашувања, притисоци, закани за бркања од работа, а во исто време демонстрираат надменост и арогантност. Главната работа како Влада им е, не да привлекуваат инвестиции и инвеститори кои што ќе отвораат нови работни места, туку како да направат штета, истакна лидерот на ВМРО-ДПМНЕ Никола Греувски денеска од Градско.

-Главната алатка на СДСМ не е да ги чујат потребите на граѓаните, туку да ги заплашат со полицијата. Станавме држава во која наместо полицијата да апси криминалци, таа го штити криминалот. Но, забораваат, можеби сега се во облаците, но колку повисоко летаат, падот ќе им биде поболен, колку повеќе се закануваат, толку повеќе сме непокорни. Колку повеќе сакаат да внесат страв, толку повеќе им порачуваме дека не им се плашиме. Забораваат дека ние сме ВМРО и дека во нас гори таа пркосна идеја која се спротивставила на многу поголеми и пострашни закани од овие, на овие неспособни луѓе, истакна Груевски.

Според него, СДСМ нема никаква програма, ниту проекти, па затоа зборува за воздух, ветер и магла.

-Видоа дека не можат да се мерат со нас со работа, со резултати и удрија на криминални избори. Во првиот круг видовме како СДСМ организира избори, страв и притисоци на сите страни. Во Македонија спроведоа класични африкански избори. Стигнавме на рангот на Сомалија и Кенија. Пукнат череп на градоначалник, убиен носител на листа на една од листите, искршени штабови на ВМРО-ДПМНЕ, следени кандидатите за градоначалници, слики на партиски активисти во натпревар кој има поголем и поопасен пиштол, а полиција молчи. Молчи затоа што е соучесник во овие работи, посочи Груевски.

Вели дека секој ден се дознава за случаи на поткуп, додавајќи дека ВМРО-ДПМНЕ реагираа на овие случаи, а СДСМ уште следниот ден продолжува со таа практика.

-Нема да не скршат, затоа што народот гледа што ни се случува и ќе им се врати како бумеранг и ќе има одговорност. Нема да не скршат, нема да им дозволиме да не скршат. Крајната цел на сето ова е да се сузбие секој слободомислечки Македонец кој се грижи за својата држава, го сака својот јазик и својот идентитет. Преку разни механизми да се делува, сакањето на државата, почитта кон својата земја да стане нешто што не е модерно, нешто што не е во тренд, нешто што е демоде, а модерно да стане легализација на геј браковите, посвојување на деца во хомосексуални браков,  модерно да стане легализација на марихуаната или максималното консумирање на алкохол и такви работи кои што во секоја земја не се нормални. Нормалното да стане ненормално, а ненормалното да стане нормално. Кон тоа не води СДСМ, потенцира Груевски.

-Криминалците на слобода, а патриотите по затвори. Красниќи, а Едмонд Темелко, борецот за човекови права на Македонците во Албанија, во затвор. Убијците на децата од Смилковското езеро кои што свирепо ги убија ќе ги пуштаат на слобода, а дедото за кубење коса – четири години затвор. Немилите настани на 27 април беа намерно испровоцирани. Тие беа реакција на реакцијата за нелеглен избор на претседател на Собранието, вели Груевски.

Нагласи дека со помош од надвор, Заев од криминалец се направил жртва, додавајќи дека ВМРО-ДПМНЕ ќе направи се во рамки на инстутциите  овие луѓе да се ослободат.

-Тие згрешија што влегоа и физички се пресметаа со дел од пратениците во Парламентот. Тоа беше погрешен чекор. Но, тоа го направила луѓе кои беа таму од патриотски причини. Кога гледаме како на слобода се пуштаат тешки криминалци како Бајруш, како Красниќи, како Рахиќ, дилер на дрога. Кога гледаме дека над 1.000 затвореници ќе ги амнестираат од кои што најголем дел за тешки телесни повреди, па што е тоа што го направија оние луѓе на 27 април во споредба со криминалите и се она што го правеле овие криминалци кои што сега, само затоа што дојде Заев на власт ќе ги пуштат на власт, нагласи Груевски.

Потенцира дека додека се прават овие спектакли, економијата во Македонија оди надолу, додавајќи дека се бележи пад на индустриското производство, извозот, девизните резерви, инвестициите, работните места, просечната плата. Тој нагласи дека пензиите не се зголемуваат, а стандардот се намалува, а со тоа расте и сиромаштијата.

-Ниту се зборува за зголемување на платите на докторите, а ветуваа дека ќе им ги зголемат на 1.500 евра, ниту за субвенции, ветуваа раст од 10 отсто, за повисока просечна плата и да не зборувам, ветуваа 500 евра, а таа веќе се намалува. Сето ова го заборавија, но не заборавија да склучат штетен договор со Бугарија без да го прашаат народот, рече Груевски.

Тој побара референдум за народот да се изјасни по ова прашање. Груевски посочи дека со Договорот за добрососедство со Бугарија, Македонија се откажала од своето малцинство во таа држава, од македонскиот јазик и се кажува оти македонската историја била бугарска, а со тоа се согласува на промена на учебниците.

-Нашите деца во иднина да учат дека Илинденското востание не било македонско, туку било бугарско, дека првата пушка на Македонскиот народ против фашизмот во Прилеп и Куманово не било тоа, туку била идеолошки конфликт на различните страни на бугарското население во Македонија, појасни Груевски, додавајќи дека тоа е големата слика каде што основно е промена на името и на идентитетот на Македонците.

Според него, дел од таа слика е и воведувањето двојазичност во Македонија со, како што рече, неуставен закон за кои тие знаат дека е неуставен, но го туркаат. Груевски потенцира дека дел од таа слика е и трајното населување на мигранти во Македонија, како и зголемувањето на даноците.

-Она за што почнаа да градат атмосфера е легализација на хомосексуалните бракови и можност тие да усвојуваат деца. Тоа е тоа редефинирање, целосно спротивно на волјата на народот кое го тераат на сила, со закани, со присилување на луѓето да гласаат, со уцени, со заплашувања и најмногу со потплата и со поткуп, рече Груевски.

Лидерот на ВМРО-ДПМНЕ им се обрати и на фунцкционерите на СДСДМ посочувајќи им дека за неколку години ќе се срамат и ќе одат со наведната глава. Според него, СДСМ има богати спонзори, но ги нема парите со кои може да го купи достоинството на народот. Груевски потенцира дека нема аир од функции кои се добиени лажејќи го и народот. Претседателот на ВМРО-ДПМНЕ побара од неопределените кои се загрижени од она што се случува во Македонија, да излезат и да го дадат својот глас во вториот круг на локалните избори, на 29 октомври.

-Сакам да ве поттикнам се спротивставите, да излезете на гласање и да го дадете вашиот глас, гордо и достоинствено, знаејќи дека ние сме тука секогаш кога на Македонија, на вашата општина, тоа и е потребно. И секогаш така ќе биде. Тие што владеат со криминалци и со корупција, треба да знаат дека нема хунта која не била победена од народот, истакна Груевски, додавајќи дека нема помрачување кое не било осветлено од народот.

Според него, СДСМ лажел дека се бори против режи, а сега тие станале најголем режим.

-Лажеа дека нема слобода и демократија, а прво нешто што направија кога дојдоа на власт – ја укинаа демократијата, и секој ден, чекор по чекор, ја земаат слободата. Велеа дека нема независно, а прво што направија кога дојдоа на власт, ги уценија сопствениците на медиумите и ја одземаа нивната независност, рече Груевски.

Порача дека Македонија и припаѓа на народот, и оти СДСМ нема да успее да ја украде. Нагласи дека нема да успеат да ги скршат, ниту да ги уплашат. Лидерот на ВМРО-ДПМНЕ потенцира дека граѓаните заедно не смеат да дозволат СДСМ да има апсолутна власт, но и да не дозволат тие да ги одземат бастионите на ВМРО-ДПМНЕ.

-Сите овие години на власт, кога СДСМ беше на власт покажаа како со ништо не придонеа за Градско. И овие 5 месеци откако се на власт апсолутно ништо не направија за општина Градско. Во општина Градско во 2006 година бројот на вработени лица беше околу 250, толку беа се на се, вработени регистрирани лица во општина Градско, а бројот на вработени на крајот на минатата година е 550. Невработеноста во Градско драстично опадна, вработеноста повеќе од дуплирана. Истовремено сакам да ви најавам дека ќе обезбедиме учениците од прво до петто одделение да имаат бесплатен, здрав оброк, најави Груевски.

Потенцира дека градоначалничката на општината ќе овозможи, жителите кои немаат сопствен дом, да се стекнат со дом, со тоа што ќе имаат можност да купат земјиште по 1 евро, почетна цена за метар квадратен. Груевски вели дека ВМРО-ДПМНЕ нуди концепт со кој нема да има неосветлена и неасфалтирана улица. Според него, градоначалничката ќе изврши санација на мостот во село Уланци.

-Реконструкција на локалниот пат Градско – Долно Чичево. Истовремено, планираме изградба на алтернативен пат за село Уланци, како и реконструкција и проширување на локалниот пат за село Виничани. Предвидуваме реконструкција на улицата „Илинденска“ во Градско, како и реконструкција на улиците „Александар Македонски“, „Панко Брашнаров“ и „Питу Гули“, најави Груевски, додавајќи дека планирана е и реконструкција на улиците во населените места Виничани, Кочилари, Уланци, Стопанство.

Нагласи дека е планирана реконструкција на водоводната мрежа во Градско, изградба на причестителни станици. Претседателот на ВМРО-ДПМНЕ најави и изградба на канализација во Стопанство и Долно Чичево. Според него, ќе се изградат тротоари и паркинзи во централното подрачје на Градско, а со тоа населбата ќе добие нов, урбан лик.

Планирана е и изградба на нова индустриска зона со што ќе се отворат нови работни места. Груевски посочи и дека се планираат две нови градинки, со што капацитетот на згрижување на децата ќе се зголеми за нови 100.

Груевски: Целта на сето ова што СДСМ го прави е промена на името на државата, јазикот, нацијата, промена на идентитетот

Просечната плата наместо да расте, како што ветуваа, таа опаѓа. Ветуваа дека пензиите ќе се зголемат, не се зголемија, се запре зголемувањето на пензиите. Стандардот не оди нагоре, туку се намалува.

Ова денеска во Демир Капија го истакна лидерот на ВМРО-ДПМНЕ, Никола Груевски, додавајќи дека сиромаштијата расте.

-Погледнете, ниту се зборува за платите на докторите, на лекарите кои ги ветуваа, ниту за субвенциите на земјоделците, за повисока просечна плата, пак, да не зборувам. Сето ова го заборавија, но не заборавија да склучат штетен договор со Бугарија, со кој што без да го прашаат народот се согласија од откажување од македонското малцинство таму, од македонскиот јазик и од македонската историја. Се согласија да се сменат учебниците од македонската историја и во иднина нашите деца да учат дека Илинденското востание било бугарско, а не македонско, дека 11 октомври не било пукање на првата пушка против фашизмот во Македонија од страна на македонскиот народ, туку идеолошки конфликт меѓу бугарското население во Македонија, меѓу левицата и десницата, посочи Груевски.

Потенцира дека на сето тоа СДСМ се согласиле без да го прашаат народот и повика на рефендум, за граѓаните да кажат што мислат за договорот со Бугарија.

-Ова е само предигра. Целта на сето ова што ни се случува е промена на името на државата, јазикот, нацијата, промена на идентитетот. Исто така, во овој пакет кој што тие го нарекоа редефинирање, освен промената на името, идентитетот, освен штетниот договор со Бугарија, се планира и двојазичност на целата територија преку Законот за двојазичност, кој што неуставен, но го туркаат. Планираат исто така, зголемување на даноците, носење на мигранти во Македонија и нивно трајно доселување по нашите градови, давање на државјанства. И се разбира, она за што веќе почнаа да подготуваат терен, а тоа е легализација на хомосексуалните бракови и можност истите да посвојуваат деца, нагласи Груевски.

На функционерите на СДСМ им порача дека неколку години од сега ќе се срамат кога ќе треба да се сретнат со граѓаните на Македонија.

-Ќе одите со наведната глава, а вашиот товар и срам нема да може да се заборави. Иако имате богати спонзори, вие ги немате парите со кои можете да го купите достоинството на народот на Македонија. Нема лезет од вас добиен од криминал. Нема аир од функции добиени лажејќи го и притискајќи го народот. Ќе се обратам и до оние кои се уште не се определени, а се загрижени од она што и се случува на нашата држава. Знам дека не ви е сеедно кога гледате што ви се случува и знам дека длабоко во себе ја чувствувате опасноста во која ја втурнуваат овие неспособни луѓе нашата држава. На дел од вас се закануваат, а дел ветуваат се и сешто, а реално нема ништо да остварат, истакна Груевски.

Тој побара од неопределените да се спротивстават на ваквото делување на СДСМ и да го дадат својот глас, додавајќи дека ВМРО-ДПМНЕ се секогаш тука, кога на Македонија и на Демир Капија тоа им е потребно.

-Тие што владеат со криминалци и со корупција треба да знаат дека нема хунта која не била победена од народ. Дека нема помрачување кое не било осветлено од народот, порано или подоцна. Лажеа дека се борат против режим, а тие станаа најголем режим. Лажеа дека нема слобода и демократија, прво нешто што направија кога дојдоа на власт – ја укинаа демократијата. И секој ден, чекор по чекор, ја одземаат слободата. Велеа дека нема независност на медиумите, а прво нешто што направија кога дојдоа на власт, ги уценија газдите на медиумите и ја одземаа нивната независност, потенцира Груевски.

Посочи дека СДСМ велеа дека ќе работат, а секој ден граѓаните гледаат како се краде и назадува.

-За ова ли се бореа? Да има техничка влада пред превремени избори? Да има премиер, Министерство за внатрешни, за труд и социјална политика, заменици за администрација, за земјоделие? Оваа држава е на овој народ и нема да му биде одземена. Порачувам дека нема да не скршат, нема да не поколебаат, ниту да не уплашат. Заеднички ќе се спротивставиме сите ние, граѓаните на Македонија. Да не дозволиме апсолутна власт во државата, да не дозволиме да станат монарси и шерифи. Да не дозволиме да ги одземат бастионите на ВМРО-ДПМНЕ. Од нас зависи, порача Груевски.

Груевски: ВМРО ќе го издржи и ова бидејќи ја има Македонија како водилка и инспирација

ВМРО ќе го издржи и ова бидејќи има света мисија пред себе, ја има Македонија како водилка и инспирација, бидејќи без разлика на се што ќе кажат и ќе ве убедуваат, ако го нема ВМРО ќе ја нема ни Македонија, порача лидерот на ВМРО-ДПМНЕ Никола Груевски, кој денеска присуствуваше и се обрати на Свечената академија по повод „Денот на Македонската револуционерна борба“.

-Денес одиме по трнлив, тежок и мачен, но исправен пат. Патот мора да се изоди бидејќи друг пат нема. Идејата мора да живее бидејќи ако ја нема идејата, ќе ја нема ни иднината. Делото мора да трае. Живееме во време кога на удар е духот на Македонецот. Нема да те скршат ако те повредат, ако те оцрнат, ако те дискриминираат, ќе те скршат само кога ќе ти го убијат духот, и кога ќе ти го убијат духот ќе ти го убијат и името. Не 100, туку 100 илјади од нас прислушувајте, вие не можете да не заплашите, не можете да не натерате да ги свиеме главите и не можете и нема да ја скршите нашата кичма, порача Груевски и додаде:

„Нивното досие во кое нас не водат како македонски националисти, алудирајки на шовинисти, е само повторување на една мрачна епоха од минатото, која ние и тоа како ќе ја издржиме, и ќе ја совладаме. Ние знаеме дека ние сме само патриоти и родољуби, кои си ја сакаат својата земја и народ и се подготвени на високи ризици во нивна заштита. И немаме ништо против или било што злонамерно кон другите земји и народи. Напротив. Ако мислеа дека со фабрикувани избори и организиран изборен инжињеринг  ќе не поразат, ќе не срозат, и ќе го поразат духот на Македонците, им порачувам дека притаснале на копче кое само не активира да нашиот организам почне да работи со 120 осто капацитет. Сите можеби некогаш и оправдано скептици, како и сите оние кои подлегнале на пропагандата ги повикувам да ја видат суштината и големата слика, и да се приклучат на вмро во оваа тешка битка. Битка која само заедно и обединети можеме да ја победиме. Ова не е битка на индивидуалци, или лидери. Тоа е минлива категорија, ова е битка на еден народ за опстанок, за идентитетски и економски опстанок“.

Храброста, патриотизмот, љубовта, самопрегорот, рече Груевски, ги добиваш од раѓањето па се до формирањето на личноста и карактерот и на нив не влијаат никакви притисоци.

Груевски: За Македонија секогаш ќе се бориме, немаме друга земја и не сакаме да имаме!

Веќе десет години, Македонија го слави 23-ти октомври како државен празник, денот на македонската револуционерна борба, денот на основањето на МРО, подоцна ВМРО. Оваа година е прва година кога не само што се прекинува традицијата на доделување на државната награда  23-ти октомври, туку и очигледна е назаинтресираноста на новата власт кон одбележување на овој празник. Затоа, сме ние тука. Кога  оваа власт се срами и се плаши од овој голем ден и празник, тука сме ние, ВМРО-ДПМНЕ да го одбележиме, прославиме, да се потсетиме и инспирираме од минатото, македонското револуционерно минато за слободата на Македонија, истакна лидерот на ВМРО-ДПМНЕ, Никола Груевски од денешната Свечена академија по повод “Денот на Македонската револуционерна борба“ во Штип.

-Во годината во која новата власт, без никаква јавна дебата, без консултација со стручната и пошироката јавност, без да го праша народот за тоа, во негово име потпиша договор со една соседна држава со кој објави дека до 1944 година нашата историја била дел од историја на таа соседна држава и дека во тој правец планира да ги менува учебниците по историја во Македонија, разбирливо е зошто бегаат од прославата на овој празник. Истовремено најавија и уште една промена на учебниците по историја, по теркот на една друга соседна држава. Ова е година кога за прв пат нашата историја стана алатка за политички преговори, доаѓање  и останување на власт. Менувањето на нашата историја, откажувањето од нашиот јазик, име и идентитет, стана алатка за некој да дојде и да се задржи на власт. Ние сме партија, која гледа, која е фокусирана кон иднината, кон подобрата и поуспешна иднина на нашата држава и народ, но не бега и не се плаши од минатото и од историјата, ниту пак ја сквернави или злоупотребува.  Напротив, тоа минато и сите тие жртви, ни даваат поттик, посеризно и поодговорно да пристапуваме кон секој нареден чекор поврзан со иднината, затоа што знаеме со колку крв, жртви и маки од нашите предци е стекнато она во кое денес ние слободно живееме како во своја држава- Република Македонија, рече Груевски.

Тој порача дека иднината на Македонија, ВМРО-ДПМНЕ ја гледа како дел од големото европско семејство, како дел од ЕУ и НАТО и во добри односи со соседите.

-Но, тоа не значи дека треба да го избришиме или да се срамиме од нашето минато, или да го препуштаме други држави да ни го интерпретираат или преправаат,  согласно нивните државни  интереси.  Живееме во тешки времиња, со големи искушенија и големи идеали. Но во какви времиња живееја нашите основачи? Основачите знаеја дека ќе треба време за да се оствари идејата, но знаеја дека најпрвин – идеја мора да има! И ја создадоа идејата, за идејата потоа да ја создаде организацијата, а организацијата го создаде делото! Делото е слободна, суверена и независна Македонија. Не им беше воопшто лесно, ниту пак едноставно, но имаа решителност и одлучност. И подготвеност за високи лични ризици. Се будеа, живееа и си легнуваа со помислата на слободата и правдата, со помислата на Македонија. Инспирираа, мотивираа, организираа, планираа, твореа и се бореа за она во што веруваа. Слободна земја на слободни луѓе. Да бидеме свои на своето. Насекаде низ својата земја, во секое село и во секој град, и дење и вечер, и во лето и во зима. Тие беа со народот, и кога беше воскликот на победата, и кога беше тагата на загубата, тие стануваа велики при најголемите искушенија и при најголемите иницијативи. Искушенијата ги доживуваа како тест на верата, вербата и довербата, живеејќи со пулсот на своите собраќа и сосестри. И никогаш не отстапија од своето верују. И затоа победуваа и кога добиваа и кога губеа битка. И кога го напуштаа овој свет, кога нивните очи за последен пат гледаа во соборците околу нив, во семејството над нив, или пак одеа во мир сосема сами мислејќи на децата, жената, мажот, родителите, кога им прелетуваа мислите за животот во тој последен грч, кога се збогуваа тие гледајќи во небото завршуваа со еден шепот на нивните усни – Македонија, порача Груевски.

Лидерот на ВМРО-ДПМНЕ истакна дека основачите на ВМРО и со својата смрт одат во победата исто како што победата значи и крикот при ослободеното село, и секогаш гласно или преќутно оставаа аманет на своите поколенија дека борбата мора да продолжи и тоа до конечната победа. Така, рече Груевски, победи идејата, организацијата и делото, така победи Македонија.

-Беа шиканирани и оцрнувани, некои се обидуваа да ја прикријат нивната заслуга, некои ги понижуваа и не ја вреднуваа нивната борба и жртва за Македонија. И сето тоа им го приредуваа луѓе кои се срамеа затоа што не се како нив и мислеа дека ако нив ги оцрнат така прво ќе се прелажат себе а потоа ќе ги прелажат и другите, ќе ги натераат другите да веруваат дека за Македонија не треба да се бориш. Каква поразителна тактика. Не им успеа. Ние наследниците на идејата на основачите, и на сите останати херои, успеавме да го осветлиме нивниот лик, да ја кажеме правата вистина, да ја отвориме историјата и да ги избришеме немакедонските погледи врз нив и нивната револуционерна страст. Да кажеме како било и колку им било тешко во борбата но и колку ние, денешните поколенија, сме благодарни за се што тие направија за нас и за нашата Татковина. И затоа денес одовде, од ВМРО-вски Штип, од градот кој даде големи жртви за слободата на Македонија и за време на периодот на активното 41 годишно делување на ВМРО, и потоа, вклучувајки го и периодот на Народноослободителната и антифашитичка борба, јас и сите ние длабоко им се поклонуваме, и со голем пиетет го потврдуваме нашиот завет: За Македонија секогаш ќе се бориме. Немаме друга земја и не сакаме да имаме! Познавајки ги жртвите и искушенијата од нашата историја и македонската борба за слобода и правда, ние денес, многу полесно ги прифаќаме сите клевети и обвиненија, сите обвинувања кои ги добиваме заради нашата посветеност и љубов кон Македонија. И велиме, да ние сме виновни за секој споменик на македонски херој од сите епохи на борбата, виновни сме за секој документарен филм со кој ја откривме вистината за македонските херои, виновни сме дека ја кренавме главата на Македонецот високо, и виновни сме дека градевме држава која чекореше напред, силна и спремна да одговори на секој предизвик, и да преживее и успее во миговите на големи предизвици. И таа наша вина, извинете, но е најголемиот комплимент кој ние можеме да го добиеме! И ние, ќе речам, парафразирајки го Делчев, со чест и со име ја носиме таа вина, порача Груевски од Свечена академија по повод “Денот на Македонската револуционерна борба“.

Груевски до Заев: Нема да го скршиш духот на Македонецот

Претседателот на ВМРО-ДПМНЕ, вчера беше гостин во емисијата „Седмица“ на телевизија Алфа, тој таму одговори на многу прашања за кои јавноста чекаше одговори. Тој на Заев му порача дека нема да успее да го скрши духот на Македонецот. Тој кажа дека премиерот Заев да ослободува лица кои убиле деца, меѓу кои се и оние од случајот кај Смилковско езеро, кој е дел од договорот на Тиранската платформа.

Тој напомена дека и самиот Заев потврдил дека ќе ослободува на 1.050 криминалци и праша до кога планираат да прават монтирани случаи.

-Нема да го скрши духот на Македонецот, нема да го скрши духот на овој граѓанин без разлика дали Груевски ќе е лидер на ВМРО-ДПМНЕ или не, дали Груевски ќе го стави тој во затвор или не. Што и да се случи сакам да му порачам дека нема да го скрши духот на Македонецот во оваа држава и нема да ги постигне своите валкани цели, потенцираше Груевски.

Интервјуто на лидерот на ВМРО-ДПМНЕ можете да го погледнете во продолжение:

Груевски на ТВ Алфа (1 дел)

Груевски на ТВ Алфа (2 дел)