ГРЦИЈА ТРИЕ РАЦЕ: Заев најави влез во недозволена постапка за решавање на името!

„Градењето на пријателството со Грција кое што го имавме сите овие месеци наназад дополнително мене лично и другите министри во Владата не охрабрува дека треба да влеземе во клинч на решавање на овој проблем“, изјави Заев.

(* клинч – Забранет зафат меѓу противниците во боксот, односно воопшто забранета, недозволена постапка)

Преговорите за името меѓу Скопје и Атина ќе се интензивираат по локалните избори најави денеска премиерот Зоран Заев. Тој потсети дека го повикал посредникот во разговорите Метју Нимиц да излезе со нови предлози и идеи за надминување на спорот за името.

Попродуктивни разговори за името по локалните избори очекува и пратеникот на грчката опозициска партија Нова демократија, задолжен за надворешна политика, Јоргос Кумуцакос. Коментирајќи ги резултатите од првиот круг од локалните избори во Македонија, Кумуцакос во интервју за АНА-МПА, изјави дека победата на СДСМ во првиот круг претставува позитивен тек на настаните и можност за натамошно подобрување на односите меѓу двете земји. Грчкиот пратеник изрази задоволство што во Македонија се подобрува атмосферата за решавање на спорот со името.

Самиот факт што националистот Никола Груевски загуби на локалните избори е позитивен тек на развојот на настаните. Сега во Скопје имаме многу посигурни и попродуктивни соговорници во однос на прашањето за името, вели Кумуцакос.

Дел од аналитичарите предупредуваат дека Македонија мора да биде претпазлива во тој процес, некои пак сметаат дека за името не треба воопшто да се преговара.

Официјална Атина преку шефот на дипломатијата Коѕијас во неколку наврати најави дека на почетокот на ноември ќе стартува со работа мешовитата комисија што ќе ја чисти историјата од иредентизам, информација која беше демантирана од нашите власти.

Груевски: Владата на СДС и Заев се откажува од 60-тина странски компании и над 25.000 работни места со кои бевме во преговори, потребна е акција сега

Претседателот на ВМРО-ДПМНЕ Никола Груевски на денешната прес-конференција истакна дека СДСМ се откажува од речиси шеесетина странски компании со кои владата на ВМРО-ДПМНЕ била во сериозна и длабока фаза на преговори. Компании кои како што рече Груевски, доколку се реализираат во Македонија ќе отворат 25.000 нови работни места.

-Владиниот тим беше во комуникација со неколку стотици компании за нивно инвестирање во Македонија, но во сериозна и многу длабока фаза на разговори бевме со речиси 60 тина компании кои доколку не бидат попречени, или на било кој начин одвратени, особено преку овие новини кои ги најави владата и севкупно со новиот однос и пристап, овие инвеститори ќе донесат потенцијално над 25.000 нови директни вработувања. Секако и голем број индиректни работни места.

Лидерот на ВМРО-ДПМНЕ ги опиша сите компании, областите во кои работат, во кој дел од Македонија биле заинтересирани и колку нови работни места планира да отворат. Посочи дека од Владата на СДСМ потребна е работа и акција сега.

– Веројатно да останеше владата на ВМРО-ДПМНЕ во меѓувреме дел од овие ќе беа започнати, а сигурно уште десетина  нови  ќе се најдоа на овој список на инвестиции во длабока фаза на договарање. Потребна е работа и посветеност.  Најголема загуба ќе биде за граѓаните и државата доколку вложениот труд не биде надограден и продолжен. Државата нема време за губење, а реализацијата на овие инвестиции ќе значи најмалку дуплирање на досегашната заработка на многу домашни компании и зголемување на извозот на државата што значи повеќе пари во буџетот, нагласува Груевски.

Милошоски: Димитров и Заев го занемаруваат нашиот примарен аргумент во односите со Грција, не бараат да се признае пресудата од Хаг

Пратеникот и член на Извршниот Комитет на ВМРО-ДПМНЕ, Антонио Милошоски на Live Chat на ВМРО-ДПМНЕ одговори на прашањето „Каков ќе биде исходот од средбата на Министерот за надворешни работи на Грција, Никос Коѕијас со Никола Димитров?“

Милошоски истакна дека има еден проблем кој се провлекува во односите на Република Македонија со Грција.

-Република Македонија во моментов недоволно стои и се држи до својот најсилен аргумент во нашите билатерални односи, а тоа е пресудата од меѓународниот суд на правдата во Хаг. 2008 година кога Грција спротивно на времената спогодба стави вето на поканата за членство на Македонија во НАТО ние поднесовме тужба во судот во Хаг, каде што имав чест да бидам застапник на Република Македонија заедно со еден поголем дипломатски и правен тим. И во 2011 година добивме пресуда, едногласна пресуда доколку се иземе гласот на грчкиот судија во која што беше одлучено дека Грција нелегално и со прекршување на времената спогодба ја блокирала Република Македонија за да добие покана за членство во НАТО, истакна Милошоски.

Нашиот примарен аргумент во односите со Грција новата влада го занемарува, министерот Димитров и Заев не бараат од Грција и меѓународната заедница да ја признае пресудата од врховниот судски орган на обединетите нации судот во Хаг додаде тој.

Милошоски наведе уште еден недостаток во односите со Грција и надворешната политика која ја води владата на Заев, а тоа е нетранспарентноста во преговорите и одлуките. Тие кога беа во опозиција ја обвинуваа за нетранспарентност владата на ВМРО-ДПМНЕ, а сега немаме никаков увид во нивната надворешна политика. Во моментов има најави за нови предлози за името, а граѓаните немаат никаков увид во сето тоа додаде Милошоски.

Беса поцврста во преговорите од ДУИ: Сега и Касами бара писмени гаранции од Заев

Не отстапуваме од принципите што писмено му ги доставивме на мандатарот и ако тој ги прифати, ќе бидеме дел од владата, но за тоа бараме на документот да биде потпишан мандатарот Зоран Заев, велат од Движењето Беса

Доколку Kасами не е подготвен на отстапки од црвените линии, за кои бара потпис од Заев, речиси е извесно дека новата влада ќе биде без Беса, односно на „Илинденска“ ќе седнат СДС, ДУИ и „Алијансата за Албанците“, анализира денешен „Дневник“. Тактизирањето на Беса го одложи екипирањето на владиниот кабинет и очекувањата се дека Заев ќе ги достави до Собранието составот и владината програма најверојатно в понеделник.

– Сметаме дека принципите за кои бараме Заев да ги прифати се за доброто на државата и оти со тоа ќе придонесеме новата влада да биде реформска. Чекаме дали Заев ќе се потпише на документот. Без целосно прифаќање на нашите принципи, во владата да нема лица осомничени во истрагите на СЈО, рокови за гласање на законот за албанскиот јазик, отворање на темата за редефинирање на државата и балансирано владеење, нема ни преговори за поделба на ресорите. Впрочем ако нема принципи, зошто би останале во политиката – вели висок функционер на Беса.

Тој додава дека има шанси за компромис само за распределбата на министерските позиции, но додава дека остануваат на ставот за контрола на владеењето, односно во секој ресор да има преставници од сите партии што ја сочинуваат владата.

Очекувањата се дека с` ќе биде јасно по средбата меѓу Заев и Kасами, која требаше да се одржи вчера попладне, откако немало поместување меѓу двете партии по телефонскиот разговор меѓу двајцата лидери откако Заев се врати од Брисел.

Претходно на Бихаќска, Заев се сретна со лидерите на ДУИ и на ДР-ДПА, Али Ахмети и Зијадин Села.

Од Беса повторуваат дека ако не постигнат договор со СДС, Беса како опозиција ќе ги поддржува сите реформски проекти на владата и прашањата што се битни за Албанците. Според функционерот, партијата с` уште не одлучила дали ќе ја гласа новата влада ако остане во опозиција.

Од СДС велат дека разговорите со Беса продолжуваат и оти се прават напори викендов да се комплетира владиниот кабинет.

– Преку разговорите ќе видиме дали Беса ќе отстапи. Веруваме дека до крајот на денот ќе биде јасно дали ќе има договор за влада.- вели функционерот.

Од исходот на разговорите меѓу Заев и Kасами ќе зависи и конечната распределба на ресорите меѓу СДС, ДУИ и Алијансата за Албанците, како и дали викендов предлогот за влада ќе влезе во Собранието.

– С` зависи од преговорите. Сакаме с` што може да се стори за владата да има поддршка од 67 пратеници. По преговорите со Беса ќе разговараме и со коалициските партнери од нашата коалиција – вели функционерот.

Исходот од преговорите меѓу Заев и Kасами го чекаат и Али Ахмети и Зијадин Села за конечно да се пребројат министерските позиции со кои ќе раководат ДУИ и Алијансата за Албанците, иако начелно ресорите веќе се распределени. Меѓу лидерите се усогласуваат и кандидатите за министерските позиции.

Села повтори дека „Алијансата“ ќе гласа за новата влада и оти ќе ~ даде време дали ќе ги реализира барањата на Албанците, во спротивно, ќе ја напуштат владата.

Според начелната поделба на ресорите, од тоа што е досега познато, СДС ќе ги предводи ресорите одбрана, МВР, култура, за каде што се споменуваат Радмила Шеќеринска, Оливер Спасовски, Едмонд Адеми, Драган Тевдовски за финансии, Никола Димитров за надворешни работи, а за труд и социјала во игра се Мила Царовска и Фросина Ташевска Ременски.

Партијата на Ахмети ќе ги задржи министерствата со кои и претходно раководеше, со исклучок на ресорот образование, кој најверојатно ќе оди за Беса ако биде дел од владата. Ова значи дека вицепремиерското столче за Рамковниот договор останува кај ДУИ, како и ресорите локална самоуправа, животна средина, правда и економија. Информациите од ДУИ се дека Ахмети неколкупати ја менува листата со имиња за министерските позиции поради несогласувањата меѓу двете крила во ДУИ. Неофицијално има нетрпение меѓу крилата што преговараа за влада со ВМРО-ДПМНЕ и за влада со СДС. Од една страна отпор има Теута Арифи и Изет Меџити како директни преговарачи со СДС да бидат министри и, од друга страна, дека не може преговарачите за влада со ВМРО-ДПМНЕ, меѓу кои и Артан Груби, сега да се дел од владата на СДС. Најсигурни имиња за извршната власт засега се Хазби Лика како претставник на военото крило, но и Бујар Османи и Лирим Шабани.

Ако „Алијансата за Албанците“ влезе во извршната власт, ќе раководи со вицепремиерската позиција за евроинтеграции и министерството за здравство, за каде што се споменува генералниот секретар Арбен Таравари.

Дневник: И српските владици за преговорите со МПЦ се крстат во СДСМ

Српските владици, најверојатно, ќе подотворат врата за меѓуцрковните преговори со Македонската православна црква на нивниот Сабор, кој вчера започна во Белград, водејќи се и со верувањето дека новата македонска владина коалиција предводена од СДСМ ќе го смени ставот кон црковниот спор. Вакво нешто може да се очекува доколку се анализираат актуелните меѓуцрковни релации и меѓусебните пораки и контакти кои беа пратени во изминативе месеци меѓу двете цркви, пишува Дневник.

Најголемите сигнали за отворањето на дијалогот, кој требаше да започне уште минатата година, со ослободувањето на Јован Вранишкоски од затвор, во изминативе два месеца дојдоа врзано со и токму од неговата Православна охридска архиепископија која е дел од Српска православна црква. Познато е, неодамна пред македонските судови беше ставена точка во судскиот спор околу „перење пари“ а во кој како обвинет се јавуваше токму Вранишкоски и неговите блиски соработници. Тие сега се на слобода и со тоа е исполнет најважниот услов којшто го поставуваа српските владици за обновувањето на дијалогот

-ПОА нема да го попречува процесот на преговори за статусот на МПЦ која си уште не е призната од ниту една православна црква, а кој до сега не можеше да се оствари токму поради режимските судски гонења на нашите членови. Сепак, упорно ќе се бори, заедно со новите власти, кои тоа го најавуваат, против расипаните судии, што стојат на патот на развојот на демократијата во нашата татковина – соопштија по ослободувањето од судското гонење Вранишкоски и неговите приврзаници

Надежта во новите власти, односно, во СДСМ и во нивниот лидер Зоран Заев од страна на српската автономна верска групација во Македонија уште повеќе беше потенцирана во неодамнешното велигденско обраќање на Јован Вранишкоски. Посланието, практично, беше негова отворена политичка поддршка на новото парламентарно мнозинство предводено од СДСМ и напад врз досега владеачката партија ВМРО-ДПМНЕ, пишува весникот.

– И нашата татковина денес е на крстопат на кој е доведена поради неуспешна политика на оние што се занимаваат со неа. Нема да заборавиме дека токму тие политичари кои ја доведоа нашата татковина во ваква мизерна состојба, претходниве години правеа си за да ја држат што е можно подолго на крст нашава Црква. Со Бога битката ја загубија, Црквата остана и опстана зашто таа не е од човек, но што ќе биде со нашата татковина? За жал, таа не е Црква и не ~ е обезбедено со сигурност место во вечноста. За долго да опстане, за ние да имаме полза од управувањето со неа, треба да имаме одговорни политичари, политичари што се подготвени да служат на граѓаните – потенцира во обраќањето Вранишкоски додавајќи и тоа дека „некои мислат дека власта ја добиле со тестамент од родителите, па имаат неотуѓиво право на неа“.

Тој, инаку, минатата година ги поддржа и протестите на „Шарената револуција“.

Неодамна и приврзаниците на Вранишкоски преку социјалната мрежа „Фејсбук“ го повикаа СДСМ да поведе истрага против МПЦ-ОА бидејќи таа „не само што настапувала против СДСМ туку и против државата“. Партијата на Заев ја потсетиле и на тоа дека ветувала дека ќе расчисти со „криминални структури на ВМРО-ДПМНЕ и со оние кои се поврзани со нив“. „Дневник“ пишуваше дека ваквото барање предизвика негативни реакции во редовите на самата ПОА поради неприфатливите обиди таа отворено да се стави на страна на една политичка партија.

СДСМ досега не одговори на прашањата на „Дневник“ дали им се прифатливи ваквите ставови и пораки кои доаѓаат од српската црковна експозитура во Македонија. Лидерот на социјалдемократите Заев неодамна во интервјуто за српски „Kурир“ излезе со ставот дека „Македонците и Србите се ист народ“. Kакви последици по статусот на ПОА во земјава, која постојано се жали на свој нерегистриран статус во земјава, тоа може да предизвика останува да се види. Оваа партија најави и генерален реизбор на сите судии во земјава, а што сигурно нема да ги одмине ниту надлежните судии за регистрација на верски заедници и религиозни групи во Основен суд Скопје 2. Во пораките кои ПОА ги праќа до СДСМ сигурно се вградени и желбите новоизбраните судии да овозможат нивна регистрација и со што би се нанел удар на МПЦ-ОА, која, како с` уште непризнаена православна црква во православното семејство, со црковен Белград треба да преговара околу свој статус.

Од друга страна, во прилог на подобрувањето на климата за преговорите сигурно ќе оди и убавиот гест на македонските владици кои подариле на СПЦ мало парче од моштите на големиот светител Јован Владимир. Владиката Тимотеј, кој го предаде подарокот за новата црква во црногорскиот град Бар вчера ни изјави дека с` уште немаат најави што би можело да се случи.

– Условите кои се поставуваа пред нас се исполнети – изјави кусо тој за Дневник.

ИГРИ ЗА ВЛАДИКАТА ГРИГОРИЕ

Во српските медиуми деновиве се информира дека собирот во Белград нема да биде ослободен од внатрецрковните игри, посебно за хеврцеговачко-захумскиот владика Григорие. Тој во српските црковни кругови има статус на личноста која е блиска со САД и со меѓународните фактори, а што не им е по волја на другите владици кои често зборуваат против НАТО и ЕУ.

За овој владика кој е дел од преговарачкиот тим за преговорите со МПЦ се шпекулира дека ќе биде префрлен во Дабробосанска митрополија, чие седиште е во Сараево, но која е значително послаба по свое влијание во црковната хиерархија.

Јанош Адер: Дојдено е времето ЕУ да започне вистински преговори за членство со Македонија

Унгарскиот претседател Јанош Адер по денешната средба со шефот на македонската држава Ѓорге Иванов истакна дека Европската Унија треба да ги започне преговорите со Македонија за нејзино членство.

-Намерите на Македонија се јасни, долгорочно тие сакаат да се приклучат кон ЕУ и НАТО. Во поглед на интеграцијата кон НАТО, скоро 10 години им нудиме позитивни, но лажливи забелешки ветувања во поглед на интеграцијата. После времето на лажливите и празни ветувања, сега навистина е дојдено времето за започнување на вистински преговори меѓу ЕУ и Македонија, вели Адер.

Претседателот на Унгарија вели дека стабилноста на Европската Унија зависи од стабилноста на Балканот.

-Според мојата оценка стабилноста на Балканот зависи од два фактора, дали миграцискиот притисок ќе се зајакне и дали балканските држави вклучувајќи ја и Република Македонија поседуваат јасна перспектива и политичка пракса за справување со миграцијата. Во поглед на миграцијата и должиме благодарност на Република Македонија поради фактот дека тие надминувајќи ги своите можности се соочуваат со миграциските предизици исполнувајќи ги овие важни задачи. Ако миграцискиот притисок се зголеми тогаш ЕУ не можат да останат скржави кон балканските земји и Македонија, да се работи за нудење на техничка, финансиска помош или зголемување на кадарот со службеници на границата, истакна претседателот Адер.

На средбата Иванов и Јанош разговарале за политичката состојба во Република Македонија, како и за можните излези од оваа криза која земјата со години ја држи во заложништво.

Груевски: Разговорите со ДУИ беа фокусирани на јазикот и платформата

Речиси целото време додека траеа преговорите, односно 90 до 95 посто од времето, разговорите со ДУИ беа фокусирани на јазикот, изјави во интервју за ТВ НОВА, претседателот на ВМРО-ДПМНЕ, говорејќи за текот на неуспешните преговори за коалицирање со ДУИ.

„Откако не успеаа амбициозните планови за рекомпонирање на гласовите, беше јасно дека тежиштето на борба ќе се префрли врз коалицирањата кои во минатото беа работа што не беше неизвесна и се завршуваше во позитивен дух, дијалог и компромиси со ДУИ. Овојпат тоа не беше така. Кога ја видовме дистрибуцијата на пратеничките места веќе насетувавме дека може да биде пречка и некој нема да пропушти да се занимава со тоа. Не сакавме однапред нешто да прогласиме за невозможно и влеговме искрено во преговорите, но увидовме дека за разлика од минатото, на другата страна не и се брза“, раскажа Груевски.

Тој рече дека со ДУИ започнале комуникација од 9-от ден, од причина што претходно во ДУИ имале внатре-партиски дебати.

„Кога ги почнавме разговорите бевме соочени со барањето на ДУИ кое беше јасно и недвосмислено. Се бараше двојазичност на целата територија на Република Македонија, изедначување на македонскиот и албанскиот јазик. Ние им го кажавме нашиот став, дека тоа не треба да се прифати и дека е нелогично да има двојазичност на целата територија во држава во која Македонци има 65, а Албанци 25 посто. Албанските граѓани живеат претежно во северозападниот дел од државата каде имаат права за јазикот, и пред, но и по Рамковниот договор. На маса беше ставена и платформата од страна на ДУИ.

Одговоривме дека не можеме да разговараме за платформа потпишана во друга држава, независно од причините. Одговоривме дека можеме да разговараме за нивни барања, а не за туѓи платформи.

Сфативме со платформата дека станува збор за обид за предоговарање на Охридскиот рамковен договор. Во минатото имавме сугестии дека Охридскиот договор е тешко постигнат и не треба да се преговара за некое предоговарање“, изјави Груевски.

Тој додаде дека ВМРО-ДПМНЕ ја наметнале дискусијата во правец на тоа да се зборува албански јазик во општините каде има 20 проценти Албанци, но да им се даде нешто и на другите етнички заедници, нешто што би им помогнало во секојдневниот живот и што би имало реална потреба од тоа.

„90 до 95 посто од разговорите беа фокусирани на прашањето за јасикот. Јас немам против јазикот и Албанците, но станува збор за нелогични барања. На овие избори имавме манипулација со албанските гласачи, се нудеше нешто што нема да им донесе ништо подобро. Што ќе им донесе на Албанците, ако во Берово има двојазичност, или ако има двојазичност во Струмица, Ресен, Демиркапија, Велес, Штип? Дискусијата ја насочивме во правец на тоа да се зборува за општините каде има 20 посто Албанци и каде живеат и поголем број луѓе од другите етнички заедници, и тие да добијат нешто. Дискусијата ја наметнавме во тој правец. Да е нешто што ќе им помогне на луѓето во секојдневниот живот, употребата на јазикот треба да има цел“, изјави Груевски.

ВМРО-ДПМНЕ со детали како се одвивале преговорите: Не поради СЈО, туку поради Платформата не дојде до договор со ДУИ

ВМРО-ДПМНЕ соопшти дека претседателот на партијата Никола Груевски заедно со секретарот за меѓународна политика на партијата Александар Николоски остварил средба со амбасадорката на Република Турација Еркал Кара и дека на истата било наведено дека не поради СЈО, туку поради Платформата не дошло до договор за коалицирање со ДУИ.

„Во поглед на внатрешните случувања од ВМРО-ДПМНЕ беше посочено дека се соочуваме со политичка криза и зад нас како држава е еден тежок период во кој се случија работи кои очигледно долго се подготвувале со одредена помош на надвореши центри, што патем речено и беше директно отворено соопштено од Зоран Заев на средбите кои во предвечерјето на кризата тој ги имаше со Никола Груевски кога го уценуваше со објавување на илјадници креирани матерјали, нешто што и целата јавност го виде. Во продолжение беше посочено, дека после се, повторно следеа фер и демократски избори на кои ВМРО-ДПМНЕ доби нов легитимитет на избори кои никој не ги оспори, иако беа очигледни одредени влијанија кои помагаа на одредени субјекти во годината пред изборите“, соопштија од ВМРО-ДПМНЕ.

На средбата се потенцирало дека ВМРО-ДПМНЕ освои најголем број на гласови и мандати и „сега имаме ситуација каде имаме обид тоа да се изгира,и дека  тоа не е добро за државата, создава нови кризи и затоа во партијата се смета дека е зрела ситуацијата за нови избори“.

„ Се посочи исто така дека во првите 20 дена од доделувањето на мандатот партијата имаше разговори за формирање на коалиција со ДУИ. Во тој период беше очигледно дека имаше вмешување на надвореши фактори вклучувајки и соседни земји што резултираше со изработка на нова платформа на албанските партии . Македонија има рамковен договор кој беше договорен во 2001та година со посредство на меѓународната заедница која, како и сите инволвирани страни,во целиот изминат период нагласуваше дека не постои можност за негово репреговарање. Оваа платформа се чини дека е токму тоа, и вистинското име на платформата е всушност обид за репреговарање на Охридскиот рамковен договор.

Меѓународната заеднца ја превзема улогата да биде еден вид гарантор на Рамковниот договор.Затоа од ВМРО-ДПМНЕ нагласува дека  Постапката за репреговарање на охридскиот рамковен договор, преку форма наречена Платформа  може да предизвика други етнички заедници да излезат со свои платформи, односно свои барања за репреговарање на договорот од Охрид.

Со цел да не се донесе земјата во уште по сложена ситуација, а имајки во обзир дека повторното преговарање на Охридскиот рамковен договор е всушност отворање на пандорина кутија, ВМРО-ДПМНЕ во разговорите со ДУИ одби да преговара за истата платформа“, велат од таму.

Од партијата, како што нагласуваат од ВМРО-ДПМНЕ, било потврдено дека СЈО треба да ја работи својата работа професионално, а не како марионета на СДСМ и други надворешни центри и согласно договорот од јуни јули 2015та, без негово менување, вклучувајќи и без негово продолжување.

„При тоа беше нагласено дека не е точно дека тоа беше причината за непостигнување на договор за коалицирање на ДУИ, иако очигледно е дека на ДУИ и одговара така да ја престави работата. Во реалноста всушност освен што на почетокот се констатира дека по ова прашање имаме различни позиции, над 95 осто од времето за разговори беше посветено на дебата околу барањето на ДУИ за измени на законот за употреба на јазиците, каде беа и главните разлики.
Во разговорите со ДУИ ВМРО-ДПМНЕ беше изрично против воведување на двојазичност на целата територија, а покажавме интерес да се води дискусија околу одредени идеи за унапредувања на законот за употреба на јазиците во оние општини каде живеат етнички заедници различни од македонскта во висина од најмалку 20 осто во рамките на општината, прашање за што исто така имаше многу разлики“, ги соопштува деталите ВМРО-ДПМНЕ.

Од страна на ВМРО-ДПМНЕ се посочи дека очигледно е дека одредени партии сакаат да ја заобиколат партијата која освои мнозинство гласови на предвремените парламентарни избори и „сакаат на тој начин да ги остварат целите поврзани со Законот за употреба на јазиците“.

ВМРО-ДПМНЕ нагласи дека ако за  носење на измени на закон кој го засега малцинството е потребен т.н. Бадентер или мнозинство од немнозинските заедници, тогаш „треба да им е јасно дека за измена нна таков закон потребна е и подршка од мнозинството на мнозинската зедница, поточно потребно е и мнозинство од македонците во парламентот“.

ПРЕГОВОРИ ЗА НОВА ВЛАДА: Груевски и Ахмети лично ќе ги водат разговорите

Преговорите за состав на новата влада ќе се водат лично помеѓу лидерот на ВМРО-ДПМНЕ и мандатар, Никола Груевски, и лидерот на ДУИ, Али Ахмети, вели за „Дневник“ Артан Груби, шеф на кабинетот на Ахмети.

Kако што веќе објавивме, Ахмети ќе го почитува воспоставениот принцип преговорите за влада да ги водат победниците на изборите од македонскиот и од албанскиот блок и оти лидерот на ДУИ веќе чека покана од Груевски за средба.

Груби вели дека нивниот претседател ќе инсистира преговорите за влада да се водат на највисоко ниво, односно лично двајцата лидери Груевски и Ахмети ќе треба да проценат дали е можно продолжување на владиното партнерство. Доколку тргнат разговорите и се процени дека е можна владина коалиција меѓу ВМРО-ДПМНЕ и ДУИ, не се исклучува можноста натамошното договарање да се спушти на ниво на партиски тимови.

Ова ќе значи дека иако ВМРО-ДПМНЕ и ДУИ петти пат ќе почнат преговори за владина коалиција, првпат разговорите за нова влада ќе ги водат лично Груевски и Ахмети.

Во 2006 година по победата на изборите ВМРО-ДПМНЕ водеше паралелни разговори и со ДУИ и со ДПА за владин партнер. Тогаш ДУИ извиси и владина коалиција формира ВМРО-ДПМНЕ со НСДП и ДПА.

По предвремените парламентарни избори во 2008, 2011 и 2014 година се воспостави принципот победник со победник и преговорите за владина коалиција ја водеа тимови на ВМРО-ДПМНЕ и на ДУИ.

Kарактеристика на претстојните преговори за влада е дека иако станува збор за веќе стари владини партнери, првпат исходот од преговорите е неизвесен. Ахмети преговорите за нова влада ќе ги услови со прифаќање на сеалбанската платформа. Груевски врати дека ако ДУИ игра со платформа и ВМРО-ДПМНЕ со коалициските партнери има платформа, но и куп забелешки кон досегашното практикување на власта од функционери на ДУИ.

– И ние и во минатото, и сега и во иднина ќе бидеме речиси 25 партии во коалиција со заедничка платформа. Ако сакаме да ја играме играта со платформи, нема проблем така ќе тераме отсега – порача Груевски во интервјуто за „Дневник“.

Ахмети, пак, за телевизија на албански јазик потврди дека очекува покана од Груевски.

– Ние ќе преговараме со партијата што ќе добие повеќе мандати – потврди Ахмети.

Од ДУИ не сакаат да прејудицираат како ќе течат преговорите. Од таму повторија дека услов е сеалбанската платформа, која ќе биде на маса пред Груевски, но и пред секој евентуален преговарач за новата влада. Оттука од ДУИ велат сè е на маса, можен е договор за влада и со ВМРО-ДПМНЕ и со СДСМ, битно е да се прифатат барањата од платформата. Во спротивно, од ДУИ не ја исклучуваат и можноста од широка коалиција, тие да бидат опозиција или ако нема договор со ниту една страна, повторно да се оди на нови парламентарни избори.

Ова го потврди и Ахмети прашан дали е за нови избори.

– Зошто да не. Сигурно дека неприфаќањето на платформата од кој и да е субјект ја носи земјата кон нови избори – вели Ахмети.

Додовска: Преговорите со партиите од албанскиот блок ќе бидат со тешкотии

Преговорите со партиите на Албанците нема да одат лесно поради ветувањата од страна на опозицијата за одредени прашања. Сепак, верувам дека ВМРО-ДПМНЕ и ДУИ повторно ќе направат коалиција, евентуално засилена со ДПА, нагласува професорката Иванка Додовска.

Таа за Телеграф.мк ја анализира актуелната политичка состојба по прегласувањето и преговорите што ќе се одвиваат за формирање на новата влада.

Сметам дека преговорите со албанскиот блок ќе бидат со извесни тешкотии. Доволно е само да го погледнеме фактот кој во текот на изборната кампања беше наметнат од опозицијата во однос на одредени прашања што се директно поврзани со интересите на албанското национално малцинство во Република Македонија. Од тие причини, претпоставувам деканајсериозна ќе биде повторно коалицијата помеѓу ВМРО-ДПМНЕ и ДУИ, но, со оглед на тоа што доколку се договорат ќе имаат мнозинство од 61 пратеник во македонското Собрание, можно е да бидат вклучени и уште најмалку една партија од албанскиот политички блок. Во овој поглед, најлогично е тоа да биде ДПА бидејќи таа е и идеолошки и традиционално блиска со владејачката гарнитура. Дали и како ќе се реализираат овие прогнози, зависи пред сè од ДУИ бидејќи во оваа ситуација е сосема реално да се очекува дека нејзините апетити ќе бидат зголемени во поглед на поделбата на владиниот колач. Ценам дека времето што доаѓа ќе донесе нови расплети на дејствијата на македонската политичка сцена за кои во наредниот период ќе имаме можност да сведочиме и во поглед на штетата што е направена врз националните интереси и во поглед на зрелоста и мудроста на релевантните политички фактори во земјата – анализира професорка.