ЌЕ ПОЧЕКАМЕ ЗА ЖИВОТ: Воздухот во големите градови загаден и опасен по здравјето – одговорните молчат

Воздухот во Скопје, Битола и тетово вечерва е опасен по здравјето на граѓаните. Додека граѓаните го дишат канцерогениот воздух, одговорните власти се кријат и не превземаат никакви мерки за подобрување на квалитетот на воздухот.

Нивото на ПМ10 честичките вечерва во скопско Лисиче изнесува енормно високи 406 милиграми на метар кубен. Ситуацијата е алармантна и во Битола, каде се евидентирани речиси 300 милиграми на метар кубен ПМ 10 честички, како и Тетово со 273 милиграми на метар кубен.

И додека граѓаните се гушат во канцерогениот воздух, актуелната власт која 10 години ја обвинуваше претходната власт околу воздухот со цел да придобие политички поени, сега истите тие се кријат од одговорност и никаде ги нема.

Илјадници луѓе секојдневно се трујат поради неспособноста на властите да се справат со проблемот со загадениот воздух. Човечки животи се губат поради неспособноста на властите да се справат со загадениот воздух. ПМ 10 честитичките се најсериозниот убиец на здравјето на граѓаните.

Загадувањето убива во Скопје

Болестите на респираторниот систем се најчестата причина за хоспитализација на населението во Скопскиот регион, покажува анализата на Центарот за јавно здравје – Скопје.

Имено, 13,9 отсто од вкупниот број на случаи на болничко лекување се должат на овие заболувања.

Неоплазмите се втората најчеста причина за прием во болница со учество од 13,5 отсто во вкупниот број на хоспитализации. Болестите на циркулаторниот систем, стојат на третата позиција со индекс од 13,4 отсто.

Болничкиот морбидитет во Скопскиот регион покажува највисока специфична стапка на болничко лекување за болестите на респираторниот систем од 14,6/1.000 жители, што е под стапката за земјите од Европскиот регион (2010) од 18,4/1.000 жители.

Болестите на циркулаторниот систем, I00-I99, со специфична стапка на болничко лекување
од 14,1/1.000 жители во Скопскиот регион, се исто така под специфичната стапка на отпусти.

Загадениот воздух ни ги крати животите за 4 години

Проф. д-р Драган Ѓорѓев од Институтот за јавно здравје предупредува дека Скопје е водечки град во Европа според загадувањето со помалите и поопасните ПМ 2.5 честички и дека во Скопје секој трет умира од загадениот воздух. Во просек, аерозагадувањето го крати животниот век за најмалку 4 години.

Загадувањето на воздухот во Скопје, Битола, Тетово, Куманово и ширум Македонија не е само криза, туку е елементрана непогода како пожар или поплава. Полоша непогода дури од поплавата во Стајковци каде, за жал, загинаа 21 граѓанин. Светска Банка проценува дека во Македонија од загадениот воздух гинат 1.350 граѓани годишно, што значи дека ни се случуваат над 60 „Стајковци“ годишно. Во просек четворица граѓан(к)и гинат дневно заради загадениот воздух. Намерно го користам терминот „гинат“ бидејќи тие се жртви на оваа елементарна непогода. Светска Банка ја рангира Македонија на петто место во Европа според најмногу смртни случаи заради загадување со ПМ честички, со што се прави економска загуба од €253 милиони годишно или 3.2% од БДП.

ПМ10 претставуваат мали честички со дијаметар од 10 микрометри кои се пет до десет пати помали од дијаметарот (дебелината) на човечкото влакно. Според Агенцијата за заштита на животна средина на САД, честичките помали од 10 микрометри се уште поопасни бидејќи се вгнездуваат длабоко во белите дробови и можат да навлезат дури и во крвотокот и да предизвикаат негативни здравствени ефекти како предвремена смрт кај лица со срцеви и белодробни заболувања, неправилно работење на срцето, влошена астма и намалена функција на белите дробови. Најновите истражувања покажуваат дека загадениот воздух предизвикува и деменција и алцхајмер.

Чувствителни групи со претходно постоечки белодробни или срцеви заболувања, како и стари лица и деца се особено ранливи. Децата се најосетливата група, затоа што имаат организам во развој и побрзо дишат, а со тоа и побрзо внесуваат загадени материи во телото. Според анализа на Институтот за јавно здравје при Министерството за здравство, секое второ дете кое побарало лекарска помош во 2015 година имало респираторни проблеми. Аерозагадувањето го намалува имунитетот на децата и ги прави подложни на хронични болести. На пример, во Пелагонискиот регион до 2012 година имало преку 200 деца заболени од малигни тумори. Во последните шест месеци уште пет деца заболеле од рак во Битола и граѓаните во Битола вперуваат прст кон загадениот воздух како главен фактор.

Проф. д-р Драган Ѓорѓев од Институтот за јавно здравје предупредува дека Скопје е водечки град во Европа според загадувањето со помалите и поопасните ПМ 2.5 честички и дека во Скопје секој трет умира од загадениот воздух. Во просек, аерозагадувањето го крати животниот век за најмалку 4 години.

Според неофицијалните податоци од апликацијата МојВоздух во 2016 година, најзагадена општина во Македонија е Тетово со 269 денови со надминување на среднодневна гранична вредност на ПМ 10 честички која изнесува 50 микрограми на метар кубен (50mg/m3). Следуваат Гази Баба со 157 денови, потоа Кичево со 144 денови, Лисиче – 137 денови, Ректорат (УКИМ) со 124 и Куманово со 123 денови. Дозволениот број на надминувања годишно е 35 денови.

РАСИПНИШТВОТО НА СДСМ: Владата во наредната недела ќе се задолжи за нови 86,9 милиони евра

Ново задолжување од високи 86,9 милиони евра е закажано на 28.11.2017 односно во вторник наредната недела.

На официјалната страна на министерството за финансии е закажана нова аукција на државни хартии од вредност и тоа на 6 месечни државни записи без девизна клаузула во висина од 500.000.000 или 8.123.476 милиони евра, потоа 12 месечни државни записи без девизна клаузула во висина од 4.600.000.000 или 74.735,987 милиони евра , 3 годишни државни обврзници без девизна клаузула во висина од 120.000.000 или 1.957.585 милиони евра и 15 годишни државни обврзници со девизна клаузула во висина од 125.000.000 или 2.030.869 милиони евра.

Министерството за финансии исто така се задолжи оваа недела на 21 ноември во висина од 31.52 милиони евра. Задолжувањата вртоглаво растат, исто така ММФ во својот извештај за Македонија ја потенцираше опасноста од големиот долг кој до 2020 доколку задолжувањата се движат со вакво темпо би пораснал на 53 % што е загрижувачка бројка бидејќи на тој начин земјата се воведува во опасност да не може да ги сервисира сопствените долгови.

Вкупниот долг на Македонија до сега изнесува близу 640 милиони евра односно со овие нови 86,9 милиони евра би пораснал на приближно 726 милиони евра што е огромна сума.
Владата на СДСМ без усул ја задолжува земјата и македонските граѓани, тие во својата кампања остро ги критикуваа задолжувањата но сега го прават сосема спротивното вртоглаво се задолжуваат без да изградат со тие пари било каков капитален проект кој е од инфраструктурана или стратешка важност за државата.

СВИРКАЧ ПРИЈАВИ: По милионте евра за возила, Спасовски спровел и сомнителна набавка на чизми од 150.000 евра

Неодамна полицискиот синдикат реагираше за старите чизми кои беа доделени на полициските службеници. Освен донираните од 1982 година чизми кои министерот Спасовски ни ги претстави како светла инвестиција заедно со донираните шкоди купени од неговиот партиски донатор, скандалозен е неквалитетот на купените 2000 пара чизми со пари од Буџетот на Република Македонија, стои во новиот текст на свиркачите на „Џастпејстит“. Во текстот се вели дека Министерот Спасовски истуркал сомнителна набавка на чизми од 150.000 евра.

„На тендерот од преку 150.000 евра кој го доби фирмата Пинко Кирил ДОО Скопје до МВР доставени се мостри за контрола на квалитет пред истите да се дистрибуираат до МВР. Откако е утврдено скандалозното отстапување од спецификациите кои се барани во набавката како водопропустливост, лабораториски сертификати кои не соодветствуваат со реалните параметри и останато, за истите не е дадена согласност да бидат примени во магацинот на МВР. Но, преку најгруба и криминална писмена наредба потпишана од Министерот Спасовски и Директорот Лазо Велковски со која им се наредува на комисијата задолжена за оваа постапка да изврши прием на чизмите, истите се дистрибуирани во МВР. За ваков вид нарушување на постапка за набавка се лежи затвор. За скандалозно неквалитетни обувки за полициските припадници се плаќа со нивното здравје. Спасовски и Велковски дали сте свесни дека тој Ваш допис не застарува и имате основ за одење во затвор за ваквата Ваша криминална постапка на кршење на сите процедури за спроведување на јавна набавка? Добро прочитајте си го законот за јавни набавки и сите останати процедури поврзани со него и консултирајте се со адвокати бидејќи ЈО сега или во иднина сепак ќе мора со ова да се позанимава. МВР не е Ваша компанија, па самостојно да одлучувате што и од кого ќе набавувате, порачуваат свиркачите.

Дека СДСМ си мисли на своите се покажа и преку најавената набавка на автомобили за МВР од фирма блиска на партијата. Неодамна свиркачите јавно повикаа на одговор, дали од фирма блиска до СДСМ, ќе се купува возила за МВР вредни милион евра?

Да потсетиме дека за скандалот со донираните „нови“ чизми од 1982 година реагираше и Независниот синдикат на полицајците, кои побараа подобрување на условите за работа и опремување на припадниците на МВР согласно Правилникот за носење и времетраење на униформата.

-Во овој период МВР доби донација на и од она што може да се види има две врсти на чизми. Едните се со производство од 1982/3 година од типот на чизми на ЈНА но со многу полош квалитет, а другите се еден вид на имитација на Планика но во многу мал број кој нема да биде доволен за сите полициски службеници, реагираа од синдикатот.

Полицијата добила „нови“ чизми од 1982 година: Донирани чизми стари 35 години!

РАСИПНИШТВОТО НА ДЕЛО: Да му помогнеме на директорот Донев поевтино да лета, поевтино да нѐ чини

Директорот на државната Агенција за промоција и поддршка на туризмот Александар Донев убедува дека Агенцијата со која директорува троши строго домаќински. За домаќинско работење го смета и фактот дека само до Буенос Аирес, Аргентина, летал со бизнис-класа. На сите други патување летал со економска класа или со нискобуџетни летови.

Донев присуствувал на Светскиот самит за авантуристички патувања што се одржа во октомври во Буенос Аирес, а одлучил да лета во бизнис-класа оти летот бил долг повеќе од 17 часа, а на самитот имал голем број состаноци.

-Агенцијата за промоција и поддршка на туризмот ги реализира буџетските трошоци строго наменски и домаќински. Првпат летав со бизнис класа за Аргентина бидејќи патот е долг, повеќе од 17 часа, а имав набиена агенда, голем број состаноци кои бараат ефикасност. На сите други патување сум летал со економска класа или со нискобуџетни компании, вели директорот Донев за СДК.мк по прозивките на социјалните мрежи.

Тој вели дека авионската карта до Аргентина во бизнис-класа била 30 отсто поскапа од онаа во економска класа, односно економска класа чинела околу 180.000 денари, а бизнис околу 220.000 денари.

Со неговата изјава не се согласуваат граѓани, кои на социјалните мрежи веќе се ангажираа да му најдат поевтини билети за Аргентина на директорот Донев.

Александар Донев е истакнат активист на Шарената револуција, кој стана државен службеник викајќи „ружна ви е владата“.

Донев не се стегаше и кога требаше да се удри по полицијата.

Донев, пред да стане директор во Агенцијата за промоција и поддршка на туризмот, беше претседател на здружение за промоција и поддршка на одржлив туризам и одговорни активности во природа „Мастсидонија“ (Mustseedonia) и консултант на повеќе меѓународни проекти за туризам.


Груевски: Ова што го работи СЈО е незаконски – целта е да се оттргне вниманието од основните проблеми со кои се соочува државата и граѓаните

Ова што го работи СЈО е незаконски, бидејќи нивниот мандат е одамна истечен и овие предистражни постапки што ги водат практично се малтретирање на граѓаните во услови кога тие не може да поднесуваат никакви обвиненија или практично работат незаконски, изјави поранешниот премиер и лидер на ВМРО-ДПМНЕ Никола Груевски по денешниот распит во Специјалното јавно обвинителство.

– Денеска бев поканет од СЈО во својство на сведок за некоја нивна, како што кажаа прдистражна постапка. Им укажав дека ова што го работат е незаконски, дека нивниот мандат е одамна истечен и дека овие предистражни постапки што ги тераат практично се малтретирање на граѓаните во услови кога тие не може да поднесуваат никакви обвиненија или практично работат незаконски, рече Груевски.

Но, како што додаде, за да не излезе дека одбегнува дошол да го каже своето мислење и да одговори на некои прашања.

– Мислам дека ова го прават со цел да сум тука пред вас да ја дадам оваа изјава. Наместо да се зборува за она што случува во државата, за она што се зборува за промена на името од страна на Заев, наместо да се зборува за профункционирањето на ветените 100 илјади денари плата за лекарите или 500 евра просечна плата, за скандалозниот договор со Бугарија или пак, да се зборува за двојазичноста која што СДСМ ја промовира во Парламентот, да се зборува за тоа дека јас сум бил повикан во СЈО и дека сум дал изјава како сведок, рече Груевски.

Според него, „сето ова е политички со цел да се оттргне вниманието од основните проблеми со кои се соочува државата и граѓаните, да се зборува за минатото и на да се замае јавноста“.

– Членот 12 алинеја 2 од Законот за кривична постапка е многу јасен, дека незаконски прибавени аудио или видео сметки, не може да бидат доказ во судска постапка, ниту по нив да се изведуваат докази. Со оглед дека се работи за предистражна постапка мислам дека законски не смеам да соопштувам, изјави Груевски по распитот во СЈО.

ЗНМ контра Владата: Македонија е заробена држава со медиуми во грч

Ветуваа слобода а воведуваат цензура. Остри критики од Здружението на новинарите на Македонија и од Институтот за општествени науки за предлог Законот за аудио и аудиовизуелни медиумски услуги.

Предупредуваат дека со законските измени и паричните казни власта сака да ги цензурира и уредува медиумите, што е спротивно на уставот. Реагираат дека Македонија станува целосно заробена држава, а медиумите се во грч. Вака предложеното решение не смее да помине во собрание.

– Актуелниот Закон е совршен пример на илиберална демократија и нејзиниот главен механизам заробената држава, во која извршната власт до толкав степен ги потчинува законодавната и судската, што е практично е единствената власт. Карактеристично за сите илиберални демократии е дека законите премногу се детализираат, што е случај и во овој Закон, со што фактички е сведен на правилник, вели Катерина Колозова од Институтот за општествени и хуманистички науки.

Претседателот на ЗНМ, Насер Селмани ја обвини Владата дека со обидот за воведување на парични казни за неетичко известување на медиумите сака да воведе цензура, која е забранета со македонскиот устав. Алармираат власта да ги тргне рацете од уредувачката политика кај приватните медиуми, зашто за програмата на телевизиите треба да одлучи пазарот, а не политичарите, кои преку казни, дополнително би се офајдиле.

– Ако помине овој член власта во иднина ќе ја утврдува вистината во медиумите, она што според нејзиниот вкус ќе биде лага ќе го казнува со пет илјади евра за медиумот и 1.500 евра за одговорното лице. Овој член од законот ќе има застрашувачки ефекти врз слободата на медиумите и слободата на говорот, ќе ја зајакне постојната самоцензура и ќе ја задуши критиката во медиумите, нагласи претседателот на ЗНМ, Насер Селмани.

Новиот предлог Закон со кој се регулира работата на медиумите е веќе скроен. Министерството за информатичко општество го стави на хартија, но без да ги консултира сите засегнати страни.

Главниот акцент е ставен на намалување на политичкото влијание, но со мерки кои отвораат простор за казни врз новинарите и слободата на изразување.

Инаку, ЗНМ во изминативе години беше меѓу најгласните во борбата за слобода во медиумите и немешањето на власта во уредувачката политика. Сега предупредуваат дека Владата практично сака да стави рака врз медиумската содржина и да изигрува главен и одговорен уредник и да им каже на новинарите што е етичко а што е неетичко известување.

СЕПАК ЌЕ ИМА КАЗНИ: СДСМ бара казните во Законот за употреба на јазиците да се намалат до 2.000 евра

Пратеничката група на СДСМ и коалицијата поднесоа четири амандмани на Предлог-законот за употреба на јазиците што ќе значат унапредување на правата на етничките заедници во земјата, изјави денеска координаторот на пратеничката група Томислав Тунтев. Амандманите, според него, имаат поддршка и од колицискиот партнер ДУИ.
– За нас е исклучително важно заеднички да дојдеме до законско решение кое навистина ќе биде во интерес на сите граѓани во оваа држава – истакна Тунтев.

Со амандманската интервенција се унапредува позицијата на помалите етнички заедници кои се наведени во преамбулата во Уставот, потенцираше Тунтев, што ќе овозможи и овие заедници да остваруваат одредени права предвидени во предложеното законско решение. Станува збор, како што појасни тој, за амандман на членот 1 на предлог-законот во кој освен албанскиот јазик СДСМ предлага да се набројат и јазиците на сите етнички заедници наведени во преамбулата на Уставот.

Исто така СДСМ поднесе амандман и за намалување на висината на казните што беа наменети за институциите што нема да го почитуваат законот.

– Според нашиот предлог казните од 4.000-5.000 евра се намалуваат на 1.000-2.000 евра. Потоа исто така ја допрецизираме регулативата при водењето на седниците во Собрание и во Влада – рече Тунтев.

Според него, овие амандмани на пратеничката група добиле поддршка и од коалицискиот партнер ДУИ, а целта е заедничко решение кое практично ќе биде применливо.

– Информирани сме од Владата дека постои заклучок и општа согласност Министерството за правда преку Министерството за надворешни работи да побара мислење од Венецијанската комисија за целиот текст на законот по неговото усвојување, како и за отворените прашања кои не се дел од овој закон, а веќе се доставени до Венецијанската комисија – рече координаторот на пратеничката група на СДСМ.

Тој потсети дека коалициските партнери јавно презедоа обврска дека ќе го почитуваат мислењето на Венецијанската комисија и во случај на забелешки дека ќе ги вградат во законот, што лани беше побарано и од еврокомесарот Јоханес Хан.

– Оттука процесот за подобрување и унапредување на законското решение не завршува со овие четири амандмани, туку и натаму ќе се работи на тоа да дојдеме до решение кое ќе биде квалитетно и практично применливо – рече Тунтев.

За Предлог-законот за употреба на јазиците се поднесени 90 амандмани од кои 84 од ВМРО-ДПМНЕ, четири од СДСМ и два од Беса.

Ванковска: СДСМ и ДУИ се мивки и кукавици – Гласаа против јавна дебата за Законот за јазици! Од кого се плашат?

Не само живот, туку и демократија дојде! Владејачката коалиција гласа против ЈАВНА дебата за Законот за јазици! Од кого се плашат!?, преку ФБ статус ова го прашува универзитетската професорка Билјана Ванковска.

Таа понатаму пишува и дека од аргументи, од сопственото свесно кршење на Уставот, од гласот на граѓаните? МИВКИ! Кукавици! И онака ќе си ја истераа својата агенда, ама вака мислат дека ќе не’ замолчат, напиша на својот ФБ профил Ванковска.

Красимир Каракачанов: Во СДСМ има соработници со бугарските служби! (ВИДЕО)

Бугарскиот министер за одбрана, Красимир Каракачанов во емисијата „Во Центар“ со Васко Ефтов, насловена:„Како се продава(ше) името на Македонија“ се осврнува на тоа дека во СДСМ има соработници со бугарските служби.

-Бидејќи во Македонија е модерно да се обвинуваат од ВМРО-ДПМНЕ дека се бугараши, бугарофили и дека спроведувале бугарска политика, можам да кажам дека многу луѓе од СДСМ многу добро соработуваа со бугарските служби, вели Каракачанов.

Полицијата добила „нови“ чизми од 1982 година: Донирани чизми стари 35 години!

Додека се чека тендерската процедура за набавка на опрема и униформа во МВР, во полициските станици за граничен надзор веќе почнале да се делат чизми од словачката донација. Од Независниот синдикат на полицијата велат дека чизмите се произведени во 1982 години и дека се наметнува прашањето за нивниот квалитет и истрајност. Според нивните информации имало два типа на чизми, од кои едните кои биле поново производство завршиле во специјалните единици, додека чизмите стари повеќе од триесет години биле наменети за граничната полиција. Слободан Стоилковски од Независниот синдикат вели дека досега полицајците особено тие од граничната полиција се снаоѓале кој како знае и умее, купувале чизми од свој џеб.

“Полицајците се снаоѓаат кој како умее, преку купување на чизми од сопствени средства или поправка на веќе постоечките кај кондураџија ако можат да се поправат. Во овој период МВР доби донација на и од она што може да се види има две врсти на чизми. Едните се со производство од 1982/3 година од типот на чизми на ЈНА но со многу полош квалитет, а другите се еден вид на имитација на Планика но во многу мал број кој нема да биде доволен за сите полициски службеници. Потребно е подобрување на условите за работа и опремување на припадниците на МВР согласно Правилникот за носење и времетраење на униформата”- вели Стоилковски.

Независниот синдикат реагира и за неисполнување на потпишаниот договор помеѓу МВР и МПС за покачување на платите за 2017 година и тоа во месец април во висина од 5% и во месец октомври во висина од 5% или вкупно 10% за цела година, кој беше дел од планот на МВР и Владата за изедначување на платите на припадниците на МВР со другите Министерства за што беше организиран протестен марш на почетокот на месецов.

“Уште за време на претходната гарнитура на власт во многу наврати како синдикат имаме реагирано преку писмени барања до Министерството, соопштенија преку медиумите, организирање на прес конференции и протести, како и на одржаните средби со министерот непосредно ги имаме предочено сериозните проблеми кои ги имаат припадниците на полицијата. Прво од условите за работа на полициските службеници, потоа немањето на униформа, опрема, МТС и моторни возила за професионално и квалитетно извршување на службените задачи”- објаснува Стоилковски.

Синдикатот очекува новата власт да не ги следи стапките на нивните претходници и да се стави крај на силната партизација во институциите.

“На Министерот јавно преку медиумите и на официјалните средби ние како синдикат му порачавме да се прекине со праксата на партизација на Министерсвото како што правеше претходната власт и да се врати професионализмот во МВР. Особено потенциравме да се почитуваат законските процедури (Законот за внатрешни работи, Колективниот договор на МВР и Правилникот за систем на кариера) при прераспоредување на полициските службеници и поставувањето на раководни кадри во МВР, бидејќи претходно или воопшто не се почитуваа процедурите или беше про-форма”- додава синдикалецот.

Колективниот договор според Стоилковски треба да претрпи сериозни измени и да обезбеди почитување на правата на вработените во полицијата.

“Во однос на Колективниот договор на МВР бараме темелни промени да не речам измена на целиот Колективен договор, па поради тоа уште во месец март 2017 година имаме доставено Предлог измена на КД на МВР до Министерот за внатрешни работи. Ова го бараме од причина што секој Колективен договор што бил потпишуван од 2006 година до денес од страна МВР и МПС како репрезентативен синдикат, бил во насока на скратување на веќе стекнатите права на вработените во МВР. Наша цел и приоритет како синдикат е прво да се вратат претходно изгубените права на вработените во МВР, а потоа дополнително и да се унапредат”- додава Стоилковски.

Лошото менаџирање со ресорот и лошите политики на минатата власт вели се гледаат во бројните тужби за непочитување на законите и неправедната прераспределба на полицајците со усни наредби на пониски позиции. Години наназад од МВР само по основ на тужби се одлеваат милионски суми, а одговорност нема.

“Претходната власт односно поедини старешини и началници на организациони единици без да ги почитуваат законите прераспоредуваа полициски службеници од едно работно место на друго со усна наредба, за што дури беше доставена телеграма од тогашниот министер за внатрешни работи Гордана Јанкуловска сите полицајци кои се поставени со усни наредби да се вратат назад во матичните станици бидејќи таквото прераспоредување е противзаконско. Или пак, полициски службеници добиваа решенија за прераспоредување од страна на Директорот на БЈБ спротивно на законските прописи и процедури. На пример имаше случаи началници или пак инспектори (работни места со високо образование) да бидат прераспоредени на работно место дежурен во станица (работно место со средно образование). Потоа никој не го спомнува масовното прераспоредување, а јас би го рекол чистка кое се случи во месец Јануари 2014 година и Октомври 2015 година без да се запазат законските процедури за прераспоредување и спротивно на Законот за внатрешни работи и КД на МВР за што имаше повеќе од 500 тужби против МВР од страна на полициските службеници”- објаснува Стоилковски.

Слична вели била состојбата и во полициските станици за граничен надзор.

“Ќе го спомнам случајот и со граничните полициски станици кои беа прогласени за издвоени објекти каде имаше еклатантен пример на кршење на законите од страна на старешините, бидејќи со усна наредба не ги евидентираа часовите на полицајците кои биле на работа. Поради сите овие незаконити постапки што ги напоменав полициските служненици го тужеа МВР и нормално МВР ги губеше судките парници и пари се одлеваа од буџетот на МВР поради незаконските наредби и злоупотреби на службената положба од страна на одредени старешини и началници. Од Министерот добивме информација дека само по основ на тужби од буџетот на МВР се одлеале повеќе од 13 милиони евра, а со толкава сума на пари можело да се опреми цело МВР, при што досега не сме виделе дека некој понел било каква одговорност за ова”- потенцира Стоилковски.

Независниот синдикат бара измени на законската регулатива и во однос на исплата на регрес за годишен одмор К-15.

“Ќе бараме и досега сме барале исплата на К-15 и писмено до МВР и преку медиумите со пресконференции, но проблемот е во законските заврзлами што ги направија како во Општиот колективен договор за јавниот сектор на РМ така и во КД на МВР. Имено во претходните Колективни договори стоеше стриктно дека на работникот му следува исплата на регрес за годишен одмор (К-15), но со измените што беа направени наместо зборовите ” му следува” беа заменети со зборовите” ако има предвидено средства во буџетот на РМ” со што во Јавниот сектор каде што спаѓа и МВР не се исплатуваше К-15 бидејќи никогаш не беа предвидени средства за таа намена. Па затоа треба да се менува законската регулатива во однос на ова прашање а посебно ова се однесува на репрезентативните синдикати да не потпишуваат Колективни договори ако не е стриктно посочено дека му следува на работникот одредено право”- вели претседателот на синдикалниот огранок на НСП –север.

Состојбата во полициските станици за граничен надзор како што вели сеуште очајна. Ова особено е изразено во станиците прогласени за издвоени објекти поради спецификата на системот на работа со непрекинат престој од повеќе денови на работа.

“За овие сериозни проблеми повеќе пати се доставувани писмени барања до МВР, организирани се повеќе пати прес конференции и протести па и лично до Министерот на средбите се презентирани состојбите за што е добиено ветување од Министерот дека ќе се работи на оваа проблематика и не само во граничната полиција каде е најкатастрофална состојбата, туку и во останати оддели во МВР за да се подобрат условите за работа и престој на полициските службеници. Но за истото ќе треба време, бидејќи проблемите биле наталожувани со години да не речам цела деценија, а исто така потребно ќе биде од буџетот на МВР да се оделат големи парични средства за подобрување на состојбите”- порачува претседателот на синдикалната Организација РЦ за ГР Север.

Независниот синдикат на полицијата очекува дека со се поголемиот број на полицајци кои пристапуваат во неговите редови ќе биде дел од синдикалниот дијалог во економско- социјалниот совет, а посебно при носење на Колективни договори и акти кои можат да дадат конструктивни предлози за подобрување на правата на вработените во МВР. Дополнително очекуваат подобрување на условите за работа и опремување на припадниците на МВР согласно Правилникот за носење и времетраење на униформата, поставувањата на раководниот кадар и прераспоредувањата на полициските службеници да биде согласно законските процедури со почитување на начелото на компететност и стручност. Оттука велат најважно е и зголемувањето на животниот стандард на вработените во полицијата кое прво треба да почне со покачување на платите во ресорот.

Извор: Фактор.мк