Илиевски: Го браниме суверенитетот и Уставот на Македонија и за тоа сме му благодарни на претседателот Иванов

Bogdan-58-den

Граѓани за заедничка Македонија, по 58-ми пат го проаѓаме ова место, ова место кое минатата година беше разрушено, кршено, палено, фарбано, ограбувано. Денеска гордо ја претставува функцијата, институцијата која што ни донесе нам неколку победи, бидејќи и ние го браниме суверенитетот и Уставот на Република Македонија и за тоа сме му благодарни на претседателот Ѓорге Иванов. Повторно го охрабруваме да не дозволи никакви лицемерни бирократи, кои во соседството спроведуваат едни аршини, кај нас други

Граѓаните 58 дена се веќе на улиците низ целата држава во борба за зачувување на суверенитетот и унитарниот карактер на својата татковина. Тие денеска повторно поминаа покрај народната канцеларија на претседателот Ѓорге Иванов, на кого повторно му се заблагодарија поради тоа што го почитува Уставот на државата.

Еден од главните организатори на граѓанската иницијатива „За заедничка Македонија“, Богдан Илиевски кажа дека му се благодарни на претседателот, бидејќи поради него граѓаните оствариле неколку победи.

– Граѓани за заедничка Македонија, по  58-ми пат го проаѓаме ова место, ова место кое минатата година беше разрушено, кршено, палено, фарбано, ограбувано. Денеска гордо ја претставува функцијата, институцијата која што ни донесе нам неколку победи, бидејќи и ние го браниме суверенитетот и Уставот на Република Македонија и за тоа сме му благодарни на претседателот Ѓорге Иванов. Повторно го охрабруваме да не дозволи никакви лицемерни бирократи, кои во соседството спроведуваат едни аршини, кај нас други – рече Илиевски.

Тој ги спомена и двојните аршини, едни работи важат за кај нас, други кај нашите соседи.

– Во Албанија на опозицијата и викаат заборавете на тоа што барате, иако ги има истите барања со опозицијата тука од минатата година. Во Србија викаат демонстрантите заслужувале да разговараат со институциите, нас не сака ни да не види, ни да се сретне. Но, на таквите луѓе Ѓорге Иванов добро им покажува каде им е местото, така и да продолжи и нека заборават сите кои чекаат од него мандат, а се качени на Тиранска платформа, тоа нема да се случи, претседателе со вас сме – изјави Илиевски.

„За заедничка Македонија“ до Претседателот: Благодарност за одбраната на суверенитетот

Bogdan-Ilievski-govor

Повторно, 51 ден, застануваме за да ја искажеме својата благодарност и почит кон човекот кој постојано на најразноразните второ и третокласни бирократи им кажува каде им е местото, истакна денес Богдан Илиевски од граѓанската иницијатива „За заедничка Македонија“.

-Ним не им е местото ниту во Народната канцеларија, ниту во Вилата Водно на средби со претседателот на Република Македонија. Место на средба со претседателот, најмуваат луѓе кои нè нарекуваат славомакедонци, луѓе кои не ја осудуваат Тиранската платформа, луѓе кои не го изговараат името на нашата држава. И денешниот гостин е испратен како што треба да биде испратен. Му благодариме и го охрабруваме Ѓорге Иванов да продолжи да го брани суверенитетот на Република Македонија- порача Илиевски за време на денешниот протестен марш на граѓанската иницијатива „За заедничка Македонија“.

Средба не е предвидена: Карл Билт наиде на затворена врата кај Иванов

Gjorge-Ivanov-nasmean

Претседателот на Република Македонија, Ѓорге Иванов нема да го прими поранешниот премиер и министер за надворешни работи на Шведска, Карл Билт кој е во посета на Македонија.

Поранешниот шведски политичар, и сегашен ко-претседавач нa‎ тинк – тенк организација која се занимава со политички анализи, доаѓа во Македонија на средба со политичките лидери, јавуваат повеќе домашни медиуми.‎

Од Кабинетот на Иванов официјално велат дека во агендата на македонскиот претседател не е предвидена таква средба.‎

Неофицијално до средба Иванов – Билт нема да дојде пред се поради непринципиелните ставови и крајно необјективниот пристап на Билт во врска со внатрешната политичката ситуација, но и поради неговиот директен обид за мешање во внатрешните работи на Македонија.

Билт честопати фаворизира одредена страна, давајќи свои коментари и изјави во врска со политичките случувања на Балканот но и во Македонија. Пред своето доаѓање во Скопје тој на својот Твитер профил напиша: „Крајот на уставната криза во Скопје не е на повидок. Се чини дела разликите во ставовите се се подлабоки. Ситуацијата е тешка.“

Иванов: Сакаме интеграција, а не гетоизација на Албанците во Македонија

Gjorge-Ivanov

Сакаме интеграција, а не гетоизација на Албанците во Македонија, вели претседателот Ѓорге Иванов во интервју за австрискиот дневен весник „Винер цајтунг“.

„Ние сакаме интеграција, не гетоизација. Доволно е тажно што некои млади Албанци не зборуваат македонски и повеќе се ориентираат кон Приштина и Тирана, отколку кон Скопје“, вели претседателот Иванов.

Ivanov-intervju-Wiener-Zeitung

Иванов за „Винер Цајтунг“: Тиранската платформа со еден удар го уништи договорот од Пржино

Ivanov-intervju
Тиранската платформа доведе до институционална криза, блокада за Влада, неизбор на претседател на Собрание, вели македонскиот претседател Ѓорге Иванов во интервју за виенскиот дневен весник „Винер цајтунг“.
Во интервјуто претседателот Иванов изразува разочараност од ЕУ, поради отсуството на осуда за тиранската платформа, со која според претседателот Иванов, се уништил договорот од Пржино.
„ЕУ е импотентна и без моќ. Тие го водеа целиот процес и го донесоа Пржинскиот договор од 2015 година со кој требаше да излеземе од кризата. Но, Тиранската платформа доведе до институционална криза, блокада за Влада, неизбор на претседател на Собрание. Европската унија и Америка беа вклучени со цел да се реши политичката криза. Но тие не ги осудуваат оние што им го попречија решавањето на политичката криза и што создадоа институционална криза. А тоа се Еди Рама и албанските политичари, кои им го срушиja целиот труд овие две години. Тиранската платформа со еден удар го уништи договорот. Сега сме во институционална криза, што нема врска со Пржинскиот договор“, вели претседателот Иванов за „Винер цајтунг“.
Во интервјуто претседателот Иванов јасно посочува дека Македонија нема поинаква стратешка цел од членството во ЕУ и НАТО.
Во однос на прашањето дали САД треба да заземе водечка улога на Балканот?, Иванов вели:
„Америка веќе не е онаа Америка што некогаш беше. Мислам дека времињата на Пакс Американа изминаа. Овде имавме Пакс Романа, па Пакс Отомана, па Пакс Американа. Оттогаш чекаме на Пакс Еуропа. Но, досега без успех“.
Прашан „Како ја гледате новата администрација на САД под новиот Претседател Доналд Трамп“, Иванов вели: На Трамп треба да му дадеме време.
Прашан за коментарите од руското МНР за случувањата во Македонија, Иванов со став: „Русија никогаш не се мешала во Македонија. Само го искажала своето мислење. Тоа е легитимно.“
Во однос на претстојното австриско претседателство со ОБСЕ и можното засилено влијание на Австрија во регионот, претседателот Иванов вели:
„Австрија е голем пријател на Македонија, но ОБСЕ е немоќна. Таа остана во 20 век. Ние веќе долго време сме во 21 век.“

Поранешниот австриски амбасадор: Ако го принудат Иванов да попушти, мултиетничка Македонија ќе се подели

Harald-Koci

Суштината на платформата од Тирана е создавање бинационална држава, чија крајна цел е отцепување на деловите каде што живее албанско население, вели во опширна и детална анализа за интернет-порталот „Вишеград пост“ поранешниот австриски амбасадор во Македонија, Харалд Kочи. Ексамбасадорот (од 1997 до 2002 година) во дипломатските кругови важи за голем познавач на актуелните состојби во сегашна Македонија, но и на историските факти и нивните импликации денес.

Уште на почетокот на анализата Kочи поентира зошто Македонија се најде во ваква ситуација.

– САД и нивните делегирани агенти во Брисел, како и НАТО и ОБСЕ, две децении се мешаат во домашните работи на оваа суверена држава – на локално ниво преку своите амбасадори или директно од своите градови – и затоа со право може да бидат наречени „квазиводачи“ во земјата. Поткрепена со ваквите мешања, долготрајната политичка криза во Република Македонија се приближува до кулминација и секоја минута може да прерасне во насилни судири. Па така, во ситуација кога Собранието се свикува нелегално – по интервенција од надвор, за да се искористи новото мнозинство за избор на влада, со исклучување на претседателот на државата – на неуставен начин – алармот свети! – предупредува Kочи во првите редови од анализата.

Според него, „тивките“ советници од надвор сакаат да го принудат Ѓорге Иванов да именува коалициска влада составена од етнички македонската Социјалдемократската партија и сите партии на етничките Албанци.

– Ова ќе биде чекор кон поделба на мултиетничката земја и тоа по должината на нејзините јазични граници – потенцира дипломатот.

„Мирните протести наспроти ланските хулигански демонстрации“

Понатаму во текстот, Kочи прави споредба на актуелните протести за кои вели дека се мирни и достоинствени, за разлика од протестите „на хулиганските демонстрации од претходната година поттикнати од Соросовата мрежа, кои оставија зад себе штета на јавните објекти видлива и денеска“.

– Денешните протести или се игнорирани од меѓународните мејнстрим-медиуми или не ја пренесуваат вистината за протестите – пишува тој.

Осврнувајќи се на етничкиот состав на Македонија, за да ги запознае читателите на неговата анализа со фактичката состојба, Kочи посочува дека најголемото малцинство во земјата се Албанците, кои, според последниот попис, се 25 проценти – бројка во која тој се сомнева.

– Денес, бројот на албанската заедница е контроверзен. Според официјалните бројки, таа е 25 отсто од вкупниот број на населението, но пописот од 2002 година, врз кој се заснова оваа бројка, најверојатно, е спроведен со многу нерегуларности – нагласува тој.

Според поранешниот амбасадор, пописот бил спроведен во т.н. Потемкинов стил, односно одредени македонски села со години празни биле претставени како полни со живот, за да се изманипулира со конечната бројка на албанско население, и сето тоа, како што вели, потпомогнато од „Албанците од Kосово, кои играа улога на станбено население во Македонија“. Одложувањето нов попис, од 2012 година наваму, вели Kочи, е поради албанските политички фактори што не ја сакаат на виделина вистинската слика.

– Тешко дека бројот на албанските жители е повеќе од 15-16 проценти, како што може да се види според податоците содржани во документација на фондот за осигурување, МВР, центрите за социјални работи… – додава поранешниот амбасадор.

„За албанското население, Македонија не е матична држава“

Според него, Албанците во Македонија не се чувствуваат како граѓани на оваа држава, ниту ја ценат како матична, тоа за нив се Kосово и Албанија, и поради тоа, вели Kочи, уште од 1991 година нивната цел е отцепување на деловите од земјата каде што тие живеат.

– Поради тоа Македонија е спречена да се развива во мир. Степенот на лојалноста на Албанците кон Македонија се гледа во фактот што во целото албанско говорно подрачје само албанското знаме е истакнато на јавните објекти, улиците и јавните места – нагласува дипломатот.

Тој оценува дека Албанците во Македонија се највисоко на скалите и во позиција да ја движат играта, кога, како што вели, на нивната партнерска страна е лидерот на СДСМ, Зоран Заев – за кого Kочи нема високо мислење.

– Овој човек е управуван од страна по само еден мотив – неговата лакомост да ја врати својата партија на врвот по повеќе од 10 години, за која цел е подготвен дури е да му ја продаде душата на ѓаволот. Со активно учество на „квазиводачите“ тој работеше на договор за коалиција со сите партии на етничките Албанци, со цел да стигнат до парламентарно мнозинство. Неговото јадро е спроведувањето на „Платформата на Тирана“ – вели Kочи.

Тој додава дека судејќи според содржината на платформата, нејзината цел е создавање бинационална држава од Македонија. Во таа насока ги критикува двојните стандарди на Европската Унија, според која е незначително кога шеф на друга влада, во случајот Еди Рама, се меша во внатрешните работи на држава што не е членка на ЕУ, а кога турски политичари прават кампањи на нејзина територија, тоа ја вознемирува.

Kон крајот на анализата Kочи потврдува дека позадината на крајната цел на тиранската платформа е Џорџ Сорос и не предвидува лесна и безболна завршница на голготата.

Македонците имаат право да се борат

Во насока на изразување поддршка на актуелните протести за отфрлање на тиранската платформа, Kочи посочува еден цитат кажан пред околу четвртина век од еден од најуспешните германски писатели и драматурзи, Бото Штрауз.

– Штрауз пишува есеј, објавен во „Дер шпигел“, кој содржи една реченица што оттогаш стана политички некоректна: „Денес, ние веќе не разбираме дека некој во Таџикистан смета оти е политичка мисија да го зачува својот јазик, на ист начин како што ние ги зачувуваме нашите реки и езера. Ние веќе не разбираме дека една нација сака да наметне свој морален кодекс против тој на другите, и е подготвена да даде жртва преку крв за таа цел. Тоа е нашата либерално-слободарска самодоволност што н` тера да мислиме дека таквиот став е лажен и за осуда“. Ако се замени Таџикистан со „Македонија“  и „морален код“ со „држава“, добивме објаснување зошто Македонците се подготвени да се борат за својата земја – завршува Kочи.

Децениска амбасадорска кариера

Харалд Kочи бил вработен во австриското министерство за надворешни работи од 1973 до 2011 година, и освен горенаведениот период на дипломатска мисија во Скопје, тој бил на оваа положба и во Северна и Јужна Америка, заменик-шеф на мисијата на австриската амбасада во поранешна Југославија.

Покрај дипломатските мисии, бил и набљудувач на ОБСЕ во Kосово во 1993 година.

Иванов за ХТВ: 67-те потписи се добиени под уцена од албанските партии

Gjorge-Ivanov

Заев е пред се многу исплашен. Преплашен. Затоа што очигледно не го испорачал тоа што се очекувало од него. Влегол во туѓа игра во која што не може сега да излезе. Тој сега прави грешки. Кога е човек исплашен прави грешки. Тие негови грешки сега го внесуваат во многу потешка состојба од онаа кога почна сево ова. Кога сакаше преку снимки, кои како што вели тој, ги добил од странски служби, да ја сруши легално избраната Влада на Република Македонија, изјави претседателот на Република Македонија, Ѓорге Иванов во интервјуто за Хрватската Телевизија, одговарајќи на прашањето која е причината за постапките на Заев.

Во интервјуто за ХТВ, Иванов посочува дека лидерот на СДСМ, Зоран Заев, 67-те потписи ги добил под уцена од албанските партии да прифати платформа која како што нагласи тој, е донесена во Кабинет на премиер на туѓа држава.

-Доколку јас дадам мандат на некој што прифатил платформа на туѓа држава, согласно нашиот Кривичен закон, членот 308, ја рушам независноста на државата. Во членот 308 изричито стои: тој што би ја довел државата во подредена состојба и зависност на друга државност се казнува до пет години, вели македонскиот претседател.

Според Иванов, ниту Уставот, ниту неговата совест, ниту свечената заклетва која ја дал како Претседател на Република Македонија, не му дозволуваат да го даде мандатот на Зоран Заев и да си дозволи да ја доведе Македонија во подредена состојба и зависност од друга држава.

– Мојата заклетва се разликува од другите  јавни функции и таму стои дека јас морам совесно и чесно да ја обавувам функцијата Претседател на Република Македонија. Да ги почитувам Уставот, законите, но и територијалниот интегритет, сувереноста и независноста на државата, вели Иванов во интервјуто за  ХТВ.

Иванов во интервју за ХТВ: Само со здрав разум и дијалог ќе дојдеме до решение

Ivanov-HRT-1

Суштината на платформата е да се смени уставното уредување на Република Македонија. Тоа значи, Македонија од мултиетничко општество и унитарна држава да постане биетничка. За споредба би можеле да кажеме, Македонија да постане еден Кипар, само што Македонија не е остров, вели претседателот на Република Македонија, Ѓорге Иванов во интервјуто за емисијата „1 на 1“ на хрватската национална телевизија, ХТВ.

Македонскиот претседател во телевизиското интервју ја образложува тиранската платформа и ги изнесува своите ставови за политичката состојба во земјата и можните решенија за излез од кризата.

Во однос на платформата од Тирана, Иванов вели дека нејзината намера е албанскиот јазик да се изедначи со македонскиот и да се промени уставниот амандман кој произлегува од Охридскиот рамковен договор, согласно кој, заедниците во Македонија своите права ги добиваат врз основа на нивната застапеност од 20 насто во државата.

-Значи интенцијата на платформата од Тирана е тие 20 проценти да се променат, албанскиот јазик да биде ист со македонскиот. И со тоа се ускратуваат стекнатите права што ги има во Македонија.  Бидејќи, Турците имаат општина каде службен јазик е турскиот јазик. Училиштата се на турски јазик. Ние имаме ромска општина, каде што ромскиот јазик е службен јазик, службениот весник е на ромски, школите се на ромски јазик, исто така и Србите имаат општина на српски јазик. Така што, со платформата од Тирана тие права би припаднале само на една заедница. Само Албанците би имале права, вели Иванов.

Запрашан како ги коментира заговорите за конфедерација на Македонија, Иванов одговара дека тоа е она што ги предизвика илјадници граѓани повеќе од месец дена да се на улиците.

-Со таа тиранска платформа, Македонија престанува да постои таква како што ја знаеме. Затоа што со таа биетничност и бијазичност што се промовираат, ние имаме два сегменти во Македонија кои се и етнички и религиозно и јазично различни. Се јавува длабок расцеп. Тогаш, граѓаните со сигурност се сомневаат во намерите на тие што ја подготвувале таа платформа. Целта не е да се обедини Македонија, туку Македонија да биде преодна фаза во создавање, можеби ќе кажам потежок збор, на трета албанска држава, изјави македонскиот претседател во интервјуто за ХТВ.

На прашањето како и дали ЕУ може да помогне во решавањето на политичката криза во Македонија, Иванов вели  дека на министерскиот совет е отворено прашањето за платформата од Тирана, но тоа јавно не се соопштува.

-Не можат јавно да ја осудат, затоа што би настанале и проблеми за главниот актер, односно за Еди Рама. Во Албанија би било проблем кога тој би се повлекол од таа платформа. Така што состојбата е сега многу покомплексна отколку што беше претходно, изјави Претседателот.

За тоа како гледа излез од политичката криза и дали нови избори би претставувале решение, македонскиот претседател вели дека состојбата на некој начин сега е блокирана, но и дека влијанието на надворешните актери е премногу силно.

Затоа треба здрав разум, да се седне и да се разговара. Затоа што секогаш се можни решенија, вели Иванов и додава дека тој како претседател досега учествувал во изнаоѓањето на две такви решенија, посочувајќи ги лидерските средби и им порача на парламентарните партии дека мора да најдат начин прво да изберат претседател на Собранието за да се отстрани правната пречка за определување на мандат.

-Потоа, да се каже дека приоритет се европските реформи, а не туѓи платформи. Тие туѓи платформи доведуваат да се создаде Влада која што ќе биде уценета и која нема да ги исполнува барањата на граѓаните. Во Македонија имаше над 90 проценти поддршка за Европската унија. Сега, таа се сведува на 70 насто. Продолжи да паѓа, затоа што се гледа немоќта да се најде решение, бидејќи се бавиме со последиците, а не со причините, вели Иванов предупредувајќи за последиците од кризата и можно нејзино пресликување и во други земји кои се во слична состојба.

Во интервјуто за ХТВ, претседателот Иванов меѓудругото говори за лидерот на СДСМ Зоран Заев, за мигрантската криза, за заканите по опстојувањето на македонската држава, за односите со Москва и Вашингтон, како и за односите на Македонија со Грција низ призма на спорот со името.

Иванов во Истанбул: Кризата во Европа е и можност за нови решенија

Ivanov-forum-Istambul

Ова е време кога целиот свет се трансформира. Европа и Азија никогаш не биле подобро инфраструктурно, економски, енергетски поврзани. Но, истовремено, Европа и Азија никогаш не биле толку културно и цивилизациски отуѓени, со пораст на ксенофобијата и стравот од различноста, порача македонскиот претседател Ѓорге Иванов на свеченото отворање на јубилејниот 20. Евроазискиот економски форум, што се одржува денеска и утре во Истанбул.

На Евроазискиот економски форум кој традиционално се одржува секоја година во Истанбул учествуваат актуелни и поранешни државници, претседатели, премиери, министри, истакнати личности од општествениот и политичкиот живот, невладиниот сектор и бизнис заедниците од 40-тина држави.

Последните неколку самити беа посветени на темите како мигрантската криза и тероризмот. Годинава Евроазискиот економски форум се одржува на тема „Човештвото на крстосница“, а меѓу темите на дискусија ќе бидат и предизвиците со кои се соочува Европската Унија.

Во овој контекст, на свеченото отворање на форумот, претседателот Иванов, како што соопшти неговиот кабинет, порача дека Европа останува да биде суперсила на животниот стил. – И, иако оваа суперсила сега е во криза, не смее да се заборави дека кризата е и можност за нови решенија, истакна Иванов во обраќањето.

Во поздравниот говор Иванов го потенцираше значењето на овој форум. – Со своите теми, дебати и идеи, форумот влијае на политиките на државите бидејќи ги отвора перспективите и ги трасира патиштата за соработка меѓу државите и економиите од Европа и од Азија, порача македонскиот претседател.

Претседателот Иванов утре ќе се обрати на претседателската сесија на форумот.

Организатор на Евроазискиот економски форум е Мармара фондацијата, група за економски и општествени истражувања која има за цел унапредување на односите меѓу ЕУ и земјите од централна Азија и Блискиот Исток.

Илиевски: Иванов вчера потврди дека ќе ги брани државните и националните интереси на Македонија

Bogdan-Ilievski-4-4

По триесет и седми пат сме тука пред оваа канцеларија, која што пред некое време беше уништувана и кршена, а ние ја отворивме и украсивме со нашето знаме кое го ставивме и денеска- изјави Богдан Илиевски од иницијативата „За Заедничка Македонија“, вечерва од пред канцеларијата на претседателот Иванов.

-И денес и тука сме да му одадеме почит на претседателот Ѓорге Иванов кој што и вчера при средбата со Туск јасно и гласно повтори дека ќе ги брани државните и националните интереси на Македонија и нема да даде да се формира на влада која нема да се откаже од Тиранската платформа. Го охрабруваме како и секој ден и не смее да попушти ниту на еден протисок- рече Илиевски.

Во моментов граѓаните од пред канцеларијата се упатуваат кон собранието на Република Македонија, а освен во Скопје протести се одржуваат и во над 40 други градови и села ширум целата Република.